1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

«د انترنيتي غلاوو په اړه د واشنگټن ادعاوي بې ځايه دي»

پیکینګ ویلي دي چې د امریکا متحدو ایالاتو هغه ادعاوې چې چینایي هکرانو د دغه هیواد د حکومت د میلیونو کارکوونکو شخصي معلومات غلا کړي دي بې اساسه او غیر مسئولانه دي. دا په داسې حال کې ده چې FBI په دې اړه څیړنې پيل کړي دي.

چین امریکا متحدو ایالاتو ته خبرداری ورکړی دی چې «مخکې له وخته د پایلو په اړه خبري و نه کړي او همداراز خیالي تورونه و نه لګوي». چين تر هغه وروسته په دې اړه خبري وکړې چې واشنګټن اعلان وکړ چې د حکومت د څلور میلیونو کارکوونکو معلومات یې له انترنت څخه غلا شوي دي.

په داسې حال کې چې چارواکو تر اوسه پوري نه دي ويلي چې دغه کار چا کړی دی، خو د کانګرس یوه جمهوري غوښتونکي غړي سوزان کولنس، ویلي دي چې هکران یا کمپیوتري غله په چین کې دي.

په واشنګټن کې د چین د سفارت یوه چارواکي ویلي دي چې دغه څرګندوني غیر مسئولانه دي ځکه د هغه په اند دا ډیر ستونزمن کار دی چې تر هیواد دباندي د هکرانو د فعالیت ځای مشخص شي.

د امریکا متحدو ایالاتو د کارمندانو د تنظیم ادارې یا OPM ویلي دي چې د دولت پخوانيو او اوسنیو کارکوونکو ته د دغې موضوع په اړه معلومات ورکوي. دغه اداره د دولتي کارکوونکو سابقه او امنیتي مسایل آزمويي.

دغي ادارې په یوه بیانیه کې ویلي دي: «د دې پیښې په پایله کې OPM به شاوخوا څلور میلیونو کسانو ته خبرتیاوي واستوي. د دغو کسانو شخصي معلومات کیدای شي چې افشا شوي وي.»

د امریکا متحدو ایالاتو د کارمندانو د تنظیم ادارې په اپریل میاشت کې د حکومتي کارکوونکو د معلوماتو د هکیدو یا غلا کیدو په اړه معلومات خپاره کړل.

دغي ادارې ویلي ول چې هغو کسانو ته چې په احتمالي توګه د دغې انترنتي غلا له کبله اغیزمن شوي دي د ۱۸ میاشتو له پاره د کرېديت د څار او شخصي معلوماتو د غلا کیدو بیمه ورکوي.

له بلې خوا FBI ویلي دي چې دغه قضیه به وڅیړي او هغه کسان چې د انترنت مجازي نړۍ له ګواښ سره مخامخوي مجازات کړي.

دا په یوه کال کې دویم ځل دی چې پر چینایي هکرانو باندي د امریکا متحدو ايالاتو د کارمندانو د تنظیم پر ادارې باندي د انترنتي برید شک کیږي. په لومړۍ پیښه کې د کوم کارکوونکي د معلوماتو د غلا کیدو په اړه څه نه ول ویل شوي.

NSA ته د انترنتي څار نور امکانات هم ورکړل شول

له بلې خوا د پنجشنبې په ورځ ویل شوي دي چې د امریکا متحدو ایالاتو د ملي امنیت ادارې یا NSA ته لا پراخ امکانات ورکړل شوي دي چې د بهرنیو دولتونو له خوا په انترنت کې د غلاو مخه ونیسي او پر هغه څارنه وکړي.

دغه معلومات د هغو اسنادو په حواله چې د NSA د پخواني کارکوونکي ادوارد سنودن له خوا خپاره شوي، ورکړل شوي دي.

نیویارک ټایمز ورځپاڼې ویلي دي چې د نویو صلاحیتونو له مخکې چې NSA ته د عدلیې وزارت له خوا په ۲۰۱۲م کال کې ورکړل شوي دي، دې سازمان ته د محکمې له امره پرته د انترنتي معلوماتو د څارلو اجازه ورکوي.

DW.COM