1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

د امریکایي سرتیري له خوا تر محکمې مخکمې د مصالحې غوښتنه

امریکايي سرتیري برادلي منینګ، تر محکمي مخکې له قاضیانو سره د مصالحې غوښتنه ‏کړې ده. که د هغه غوښتنه ومنل شي نو سزا به یې راکمه کړای شي. پر دې سرتیري ‏باندې د امریکا د محرمو اسنادو د بربنډولو تور لګول شوی دی.‏

یادښت: په انځور کې منځینی وګړی برادلي منینګ دي.

برادلي منینګ د امریکا په پوځ کې په خصوصي ډول ګومارل شوی وو. د هغه مدافع ‏وکیل ويلي دي چې دغه امریکایي سرتیری اوس غواړي چې څارنوالانو ته یو غوښتنلیک ‏واستوي او په استماعیه جلسه کې د خپلې سزا د کمیدو غوښتنه وکړي. د برادلي منینګ ‏استعماعیه غونډه، په «فورت مید» پوځي اډه کې د هغه تر لومړنۍ محکمې مخکې ‏دایریږي.‏

د برادلي منینګ مدافع وکیل زیاته کړې ده چې د هغه مؤکل پر خپل ځان باندې لګیدلي ټول ‏تورونه نه مني. پوځي محکمه باید د منینګ د غوښتنلیک د منلو په اړه یوه پریکړه وکړي ‏او تر هغه وروسته به بیا قاضیان په دې اړه یوه فیصله وکړي چې ایا پر دغه امریکايي ‏سرتیري باندې لګیدلي تورونه یو څه راکم شي او که نه.‏

که پر برادلي منینګ باندې لګول شوي ټول تورونه په اثبات ورسیږي، نو کیدای شي چې ‏هغه ته د عمر بند سزا واورول شي. د دغه امریکايي سرتیري مدافع وکیل کومس، ویلي ‏دي: «منینګ د سزا د کمولو له پاره دغه غوښتنلیک له دولت سره د یوې معاملې په ‏چوکاټ کې نه دی استولی.»‏

که د منینګ غوښتونلیک ومنل شي نو هغه به دا تور چې د دولت محرم معلومات یې بربنډ ‏کړي دي ومني، خو له دې به انکار وکړي چې ګواکې هغه دولتي کمپیوترونه په غیر ‏قانوني ډول کارولي او له دښمن سره يې مرسته کړې ده. دغه غوښتنلیک به د محکمې کار ‏اسانه کړي. په پلان کې ده چې د منینګ محکمه به د ۲۰۱۳ کال د فبروري میاشتې په ‏څلورمه نیټه جوړه شي.‏

د منینګ وکیل ویلي دي چې پر هغه باندې لګول شوي تورونه ډیر قوي دي. دغه ‏امریکايي سرتیری په ۲۰۱۰ کال کې ونیول شو. دې سرتیري هغه وخت په بغداد کې د ‏امریکا د استخباراتي معلوماتو د څیړونکي په توګه کار کاوه. پر هغه باندې د افغانستان او ‏عراق د جګړو په هکله د یو شمیر محرمو اسنادو د بربنډولو تور لګول شوی دی. ‏همداراز دغه سرتیری پر دې هم تورن دی چې د امریکا ۲۶۰ دیپلوماتیک سندونه یې افشا ‏کړي دي.‏

تر هغه وروسته چې ویکي لیکس د امریکا محرم اسناد خپاره کړل نو، دغه هیواد په ‏نړیواله کچه له سیاسي لحاظه د شرمنده ګۍ سره مخامخ شو. د ویکي لیکس انترنیتي پاڼې ‏هیڅ کله هم دا خبره نه ده منلې چې برادلي منینګ هغوی ته د امریکا محرم اسناد ورکړي ‏دي.‏

مسعود جهش/ دویچه ویله
کتونکی: شمس الرحمان ناصر‏