1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

"د امریکايي سلاکارانو شکمن وژونکی يو افغان دئ"

یوې افغاني دولتي سرچینې ویلي دي چې پولیس د هغه استخباراتي مامور په لټه کې دي چې د کورنيو چارو په وزارت کي د بهرنيو سلاکارانو د وژلو شک ورباندي کيږي.

د کورنیو چارو وزارت یوې سرچینې د فرانسي خبري آژانس ته ویلي دي: «د پولیسو یو افسر چي د کورنیو چارو د وزارت د استخباراتي څانگي له پاره ئې کار کاوه لا درکه شوی دئ.»

دغه لوړپوړي پوليس د نوم د نه اخيستلو په شرط ويلي دي چي چارواکي د هغه په اړه شکمن دي او د هغه په لټه کي دي.

تيره ورځ د افغانستان د کورنيو چارو وزارت په دننه کي دوه تنه امريکايي سلاکاران پخپله کوټه کي د نا معلوم کس له خوا په گوليو وويشتل سول.

په افغانستان کي مېشتو ناټو ځواکونو د خپلو دوو سلاکارانو تر وژلو وروسته د افغانستان له ټولو ملکي ادارو څخه خپل منسوبین را وایستل.

په کابل کی ځایي تلویزونونو د خپلو سرچینو په حواله ویلي دي چې دغه کس چي اوس د امریکايي سلاکارانو د وژلو شک ورباندی کيږي ۲۵کلن دئ.

د ځايي رسنيو په حواله دغه کس په پاکستان کې زده کړې کړي دي او په ۲۰۰۷ کال کې ئې د کورنیو چارو په وزارت کي د موټر چلوونکي په توگه دنده پیل کړې وه.

ویل شوي دي چې دغه کسي مخکي تر دې چي لادرکه سي د شنبې په ورځ د کورنیو چارو وزارت ته ورننوتی وو.

تيره ورځ تر پيښي لږ وروسته په افغانستان کي وسله والو طالبانو د امريکايي سلاکارانو د وژلو پړه پرغاړه واخيستله.

آژانسونه/ سید ریاض
کتونکی: نجیب الله زیارمل