1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

د القاعدې مشر د طالبانو له مشر سره خپله وفاداري اعلان کړه

د القاعدې مشر ایمن الظواهري د خپلي ډلي وفاداري د طالبانو له نوي مشر ملا اختر محمد منصور سره اعلان کړې ده. هغه دغه خبري په یوه غږیز پیغام کې چې په انترنت کې خپور شوی دی کړي دي.

ایمن الظواهري په دغه ثبت شوي پیغام کې ویلي دي: «د القاعدې د امیر په توګه زه له تاسره خپله وفاداري اعلانووم. له دې سره زه د شیخ اسامه بن لادن او د هغه د شهیدو ورورونو لار چې له ملا عمر سره یې وفاداري اعلان کړې وه تعقیبوم.»

ملا عمر او اسامه بن لادن یو له بل سره نزدې اړیکې لرلې. هغه د طالبانو د رژیم تر ړنګیدو دمخه په افغانستان کې اوسیدی چې بیا په ۲۰۱۱م کال کې د امریکایي ځواکونو له خوا د پاکستان په ایبټ آباد کې ووژل شو.

ظواهري له منصور څخه غوښتي دي چې شرعي قانون نافذ کړي او «د مسلمانو د ټولو اشغال شوېو سیمو تر آزادیدو پوري» خپل جهاد ته دوام ورکړي.

ملا اختر محمد منصور د جولای مياشتي پر ۳۱مه نېټه د طالبانو د نوي مشر په توګه وټاکل شو. د طالبانو دغه غړی له هغه وروسته مشر شو، چې افغان حکومت د ملا عمر د وژل کیدو خبر تائید کړ.

د طالبانو ځيني غړي د منصور له ټاکل کیدو خوښ نه دي او ویل کیږي چې له همدې کبله د دې ډلې تر منځ اختلافات پیدا شوي دي.

ظواهري په داسې حال کې له منصور سره خپله وفاداري اعلانوي چې د القاعد او اسلامي دولت ترهګړو ډلو تر منځ سیالي مخ پر زیاتیدو ده.

DW.COM