1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

داعش دوهم جاپانی هم وواژه

تروريستي ډلي «اسلامي دولت» دوهم جاپانی يرغمل هم وژلی دئ. د جاپان لومړي وزير ابي، ويلي دي: «موږ به هيڅکله تروريستان ونه بخښو». تر قتل وروسته په نړۍ کي له جاپان سره پيوستون ښوول سوی دئ.

د امريکا متحدو ايالاتو جمهور رئيس بارک اوباما د تروريستي ډلي «اسلامي دولت» له خوا د دوهم جاپاني وژنه سخته غندلې ده.

اوباما دغه جاپانی ژورناليست چي د افراطيانو له خوا ئې سر پرې سوی دئ، داسي يو زړور انسان بللی دی، چي تلاښ ئې کاوه د سوريې د خلکو رنځ نړيوالو ته ور وښيي.

اوباما د جاپان له لومړي وزير شينزو ابي او جاپانيانو سره خپل پيوستون ښوولی دئ. اوباما دغه راز اعلان کړی دئ: «امريکا متحد ايالات به له خپلو شريکانو په جوړ پراخ ائتلاف سره د اسلامی دولت ډلي پرضد اقداماتو ته ادامه ورکړی، څو دغه ډله کمزورې او له منځه ولاړه سي.»

د جاپان صدراعظم شينزو ابي، هم د تروريزم پرضد مبارزه کي د نړيوالي ټولني د ملاتړ هوډ کړی دئ.

جاپان، د دوو تنو جاپانيانو تر يرغمل کيدو لږ دمخه له هغو هيوادونو سره د ۲۰۰ ميليونو ډالرو د مرستي اعلان کړی وو، چي د اسلامي دولت ډلي له گواښ سره مخامخ دي.

افراطي ډلي «اسلامي دولت» د جنورۍ مياشتي پر ۲۴ نېټه يو يرغمل سوی جاپانی وواژه، او اوس ئې د دوهم جاپاني د وژلو ويديو هم خپره کړې ده. دغه ويديو د «سايت» په نوم ويبپاڼي له خوا چي د اسلاميستانو کړه وړه څاري تائيد سوې ده. د جاپان حکومت هم دغه ويديو رښتينې بولي.

ټول يرغمل دي آزاد سي

د بريتانيا لومړي وزير ديويد کامرون او د فرانسې جمهور رئيس فرانسوا اولاند هم د گوتو، وژنه غندلې ده. کامرون په تويتر کي ليکلي دي چي د گوتو وژنه «د اسلامي دولت ډلي وحشت ښيي».

د فرانسې جمهور رئيس ويلي دي چي فرانسه له جاپان سره پيوستون لري. د فرانيسې د اليزه ماڼۍ څخه په خپره سوې وينا پاڼي کي راغلي دي چي دغه هيواد به له جاپان سره په گډه په منځني ختيځ کي د سولي د ټينگښت او تروريستانو د له منځه وړلو په برخه کي کار وکړي.

د ملگرو ملتونو عمومي منشي بان کي مون، له افراطيانو څخه غوښتي دي چي ټول يرغمل کسان بې له کومه شرطه آزاد کړي.

د اسلامي دولت ډلي د دغه جاپاني او يوه اردني پيلوټ د آزادولو په بدل کي په اردن کي د يوې افراطۍ عراقۍ بندۍ د آزادولو غوښتنه کړې وه. د اردني پيلوټ سرنويشت لا تر اوسه پوري روښانه نه دئ.