1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

NRS-Import

ترهګريز ګواښ، آلماني پوليس په تيارسئ کي

د نيمي شپې څخه لږ تر مخه د آلمان د لوی ښار مونشن پوليسو د اورګاډو تمځايونه خالي کړل او د تيارسئ په حال کي راغلل. د هغه وروسته چي د ځانمرګي بريدونو په تړاو خبرداری ورکول سو.

په مونشن ښار کي اوس وضعه تقريبا بېرته عادي حالت ته راغلې ده. خو ويل سوي چي پوليس اوس هم د تيارسئ به حالت کي دي. دا هغه وروسته چي تېره شپه د نوي کال د لمانځنو پر وخت د ځانمرګي بريدونو خبرداری ورکول سو.

د نيمي شپې څخه لږ تر مخه د آلمان د بايرن ايالت د مرکزي ښار مونشن پوليسو په روښانه توګه ولسي خلکو ته د ترهګرۍ د ګواښ له کبله خبرداري ورکړل. پوليسو پر خلکو ږغ وکړ چي د لويو اجتماعو جوړولو څخه دي ډه ډه وکړي. پوليسو د ولسي خلکو څخه وغوښتل چي په زیاته بيا د مونشن د اورګاډو د مرکزي او د پاسينګ په نوم تمځايونو څخه دي ليري واوسي.

ياد دواړه تمځايونه د پوليسو له خوا خالي کړل سول. د پوليسو چارواکي چي درنې وسلې ورسره وې، تر څو ساعتونو پوري يې د يادو تمځايونو دروازې وتړلې. خو دغه دواړه تمځايونو اوس بېرته پرانستل سوي دي. د مسؤلينو يوې وياندي ويلي دي چي اورګاډي د پلان سره سم بېرته کولای سي چي تګ راتګ وکړي. دغې وياندي زياته کړې چي پوليس به موجوده وي او بعضي کسان به کنټروليږي.

پوليس په اسلامستي بريدګرو پسي ګرځي

د بايرن ايالت د کورنيو چارو وزير يوآخيم هېرمان ويلي دي چي د دغو ترهګريزو بريدونو منبع د «اسلامي دولت» يا داعش ډله ده. هېرمان د پنجشنبې په ماخستن وويل چي د ملګرو هيوادونو استخباراتو ورته معلومات ورکړي چي په مونشن کي نوي کال په مراسمو کي ځانمرګی بريد تر سره کېدلای سي. د آلمان خبري آژانس خبر ورکړی چي آلماني چارواکو ته دغه معلومات د فرانسوي استخباراتو له خوا ورکول سوي ول.

هېرمان په عيني حال کي د سختو امنيتي اقداماتو څخه دفاع وکړه. هغه وويل: «موږ يوه عمومي تګلاره لرو چي له مخي يې موږ ترهګرو ته اجازه نه ورکوو چي زموږ ژوند تعين کړي.» هغه زياته کړه خو کله چي د احتمالي بريد ځای او وخت دومره دقيق خبرداری ولري، نو بيا بايد څوک پرېکړه وکړي.

په مونشن کي ۵۵۰ امنيتي چارواکي د امنيت ټينګولو په دنده ګومارل سوي دي. تر اوسه لا دا نه ده معلومه کړل سوې چي ايا په رشتيا د ځانمرګي بريد پلان جوړ سوی ؤ او که څنګه.