ترمپ وایي ناټو نور مخ پر زاوال نه دی | آلمان او نړۍ | DW | 13.04.2017
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

ترمپ وایي ناټو نور مخ پر زاوال نه دی

دونالد ترمپ د ناټو له عمومي منشي ینس ستولتنبرگ سره تر لیدنې وروسته د «نویو شرایطو له پاره د نویو حل لارو» غوښتنه کړې. هغه همداراز ویلي دي چې د ناټو غړي باید خپله برخه لګښتونه پر غاړه واخلي.

د امريکا متحدو ايالاتو ولسمشر دونالد ترمپ ژمنه کړې ده چې د ناټو له «لا عصري کیدو» سره مرسته وکړي، څو کولای شي د نویو ستونزو لکه ترهګري او مهاجرت پر وړاندې ښه کار ورکړي.

ترمپ د چهارشنبې په ورځ په واشنګټن کې د ناټو له سرمنشي سره په یوه ګډ کنفرانس کې له ناټو سره خپله ژمنتیا یو ځل بیا تازه کړه.

د امریکا ولسمشر همداراز هغه بدلونونه وستایل چې ناټو د ترهګرۍ پر وړاندي مبارزه کې راوستي دي. ترمپ د کمپاینونو پر مهال خپلې وینا ته په اشاره کولو سره وویل: «ما ویلي ول چې هغه [ناټو] مخ پر زاوال ده. ناټو نوره مخ پر زاوال نه ده.»

ترمپ بروکسل ته د خپل سفر په اړه خبرو پر مهال ټینګار وکړ چې هر نسل هڅه کړې ده، څو ناټو د خپل وخت د اړتیا پر اساس برابره کړي. هغه وویل: «موږ باید د هغه ستړي فکر په قید کې پاتې نه شو چې ډیر کسان یې لري، بلکي باید نوې حل لارې خپلې کړو چې د نړۍ له نویو شرایطو سره برابري وي.»

د ناټو مشر هم په دې سازمان کې د امریکا د نقش ستاینه وکړه. هغه په ځانګړي توګه په ختيځي اروپا کې د لا ډیرو امریکایي ځواکونو ځای پر ځای کیدو ته اشاره وکړه. هغه په عین حال کې له امریکا متحدو ایالاتو سره د ناټو مرستې ته هم اشاره وکړه او ویې ویل چې بل هیڅ ځواک له دومره ملاتړه برخمن نه وو.

خپله برخه مصرف باید پر غاړه واخلي

ستولتنبرگ او ترمپ د ناټو پر نورو غړو باندي غږ وکړ چې خپل دفاعي لګښت هغي اندازې ته ورسوي چې سپارښتنه یې شوې. د ناټو غړي باید د خپل ملي ناخالصه عاید دوه سلنه برخه پر دفاعي چارو ولګوي.

ترمپ وویل: «د ګډو چلنجونو پر وړاندې د دریدو په موخه، موږ باید په دې هم ځان ډاډه کړو چې [د ناټو] غړي خپل مالي مسئولیت ادا کوي او هغه پیسې ورکوي چې باید ور يې کړي.» ترمپ زیاته کړه: «ډیر هیوادونه دا کار نه کوي.»

د امریکا متحدو ایالاتو ولسمشر ټینګار وکړ: «که نور هیوادونه پر امریکا باندي د اتکا پر ځای، خپله برخه مصرف پر غاړه واخلي، نو زموږ امنیت به لا هم ښه وي او زموږ ملګرتیا به تر دې هم پیاوړې وي.»

ترمپ: دا به ډیره ښه وي چې له روسیې سره ښې اړيکي ولرو

ولسمشر ترمپ په سوریې کې د کیمیاوي وسلو کارونه وغندله. لویدیځ هیوادونه د اسد رژیم د دغو وسلو د کاروني تر شا بولي. ترمپ ټینګار وکړ چې ټول هیوادونه باید د دغه شان بریدونو پر وړاندي چې بیګناه ماشومان وژني ودریږي.

خو له روسیې سره د راتلونکو اړیکو په اړه هغه یو څه ارام وغږید او ویې ویل چې په تمه دی چې د بهرنیو چارو وزیر ریکس تیلرسن، ورته احوال ورکړي. تیلرسن اوس په مسکو کې له روسي چارواکو سره په خبرو اترو بوخت دی.

ترمپ خبریالانو ته وویل: «دا به ډیره ښه خبره وي چې که ناټو او زموږ هیواد له روسیې سره جوړ راشي. پوتین د روسیې مشر دی او روسیه یو پیاوړی هیواد دی. امریکا متحد ایالات هم ډیر پیاوړی هیواد دی. موږ به وګورو چې دا هرڅه به څرنګه پر مخ ولاړ شي.»