1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

ترمپ له ميليونونو غير قانوني مهاجرو د وتلو غوښتنه کړې

د امريکا متحدو ايالاتو نوي انتخاب سوي جمهور رئيس دونالد ترمپ له هغو مهاجرو څخه د وتلو غوښتنه کړې چي په دغه هيواد کي په «غيرقانوني» توگه اوسيږي. هغه ويلي دي چي له مکسيکو سره په گډ سرحد کي به دېوال هم پورته کړي.

دونالد ترمپ پر خپل هغه نظر اوس هم ټینگار کوي، چي وايي له امريکا څخه دي هغه مهاجر ووځي چي راجستر سوي نه دي.

د فرانسې خبري آژانس د راپور له مخي ترمپ له CBS تلويزيوني شبکې سره په يوه يو ساعته مرکه کي ويلي دي چي د خپل جمهوري رياست د دندې په پيل کي به د هغو درو ميليونو مهاجرو ډېره برخه له هيواده وباسي چي په غيرقانوني توگه اوسيږي.

ترمپ ويلي دي: «هغه کار چي موږ غواړو وکړو، هغه دا دئ چي هغه کسان چي جنايي سابقه ولري، يا د مخدرو موادو په قاچاق کي لاس ولري او يا له کوم بانډ سره لاس ولري هغه به له هيواد څخه باسو يا به ئې بندي کوو.» هغه ويلي دي چي د دغه ډول کسانو شمېر په امريکا کي نژدې درو ميليونو ته رسیږي.

د فرانسې خبري آژانس د راپور له مخي دغه ميلياردر ملکي سوداگري او له مکسيکو سره په سرحد کي د امنيت مسئله ئې د انتخاباتي کمپاين سرټکي ول او په دې سره ئې له خپلي سيالي هيلري کلنتن څخه د نوامبر پر ۷ د امریکا د ولسمشرۍ انتخابات وکټل.

ترمپ په دغه مرکه کي زیاته کړه، هغه ديوال چي د امريکا متحدو ايالاتو او مکسيکو ترمنځ جوړيږي هغه به له خټو نه وي جوړ.

ترمپ د امريکا د ولسمشرۍ له پاره ټاکنو کي تر بريا وروسته پخپله لومړۍ مرکه کي له مکسيکو سره په گډ سرحد کي د دېوال جوړولو په اړه وويل: «په ځينو برخو کي به نښتي رامنځ ته سي.» هغه زياته کړه: «خو د سرحد په ځينو برخه کي دېوال پورته کول مناسب کار دئ. زه دغه کار چي نوم ئې ودانۍ جوړول دي ډېر ښه کولای سم.»

DW.COM