1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

سيمه

تاجیکستان او چین د افغانستان پولې ته نزدې پوځي مانورونه کوي

تاجیکستان د پنجشنبې په ورځ له چین سره د ترهګرۍ پر ضد ګډ پوځي تمرینونه پیل کړي دي. دغه تمرینونه د افغانستان پولې ته نزدې ترسره کیږي او په سیمه کې د امنیت د ښه کولو په موخه د چین د هڅو یوه برخه ده.

د تاجیکستان د دفاع وزارت د فرانسې خبري آژانس ته ویلي دي چې دغه تمرینات به د تاجیکستان پر خاوره د اکتوبر تر ۲۴مې نیټې پورې دوام وموندي چې په کې لږ تر لږه ۱۰ زره سرتیري شامل دي. په دې تمریناتو کې پوځي وسایط او الوتکې ګډون لري.

تیره میاشت تاجیک چارواکو خبر ورکړ چې چین به له افغانستان سره د دې هیواد پر ۱۳۰۰۰ کیلو متره پوله باندې امنیتي بنسټونه قوي کړي. له همدې پولې څخه ډیر وخت د مخدره موادو د قاچاقو لویه برخه ترسره کیږي.

چین، تاجیکستان، پاکستان او افغانستان د روان کال په لومړیو میاشتو کې د ترهګری پر ضد د مبارزې پر سر توافق کړی وو.

د پخواني شوروي په غړو هیوادونو کې امنیتي موضوع ګانې څو کاله مخکې یوازې روسیې پورې مربوطې وې او همدې هیواد به یې د حلولو له پاره اقدام کوو.

خو په وروستیو وختونو کې د روسیې او چین په مشري د شانګهای د همکاریو سازمان له رامنځ ته کیدو سره، وضعیت بدلون موندلی دی. د پخواني شوروي اتحاد څلور غړي هیوادونه، هند او پاکستان هم د دې سازمان غړیتوب لري.

په اګست میاشت کې په قرغزستان کې د چین پر سفارت باندې یوه ځانمرګي برید، په سیمه کې د امنیت له راتلو سره د چین لیوالتیا وښوده. قرغزي چارواکو د دغه برید پړه، چې په پایله کې یې درې کسان ټپیان شول او یوازې برید کوونکی ووژل شو، پر ایغور یاغیانو باندې اچولې وه.

DW.COM