1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

بهرمیشتي افغانان په ټاکنو کې ګډون غواړي

په بهرنیو هیوادونو کې میشت ډیری افغانان وايي چې حکومت باید د ۱۳۹۳ کال په ټاکنو کې دوی ته د رایه ورکولو زمینه برابره کړي. خو د ټاکنو کمیسیون وایي چې دا کار ډیرې بودجې ته اړتیا لري.

یو شمیر بهر میشتو افغانانو د شنبې په ورځ (د ۲۰۱۳م کال د اګست دریمه) په کابل کې د ټاکنو کمیسیون له چارواکو وغوښتل تر څو دوی ته په بهرنیو هیوادونو کې په افغان سفارت خانو او قونسلګریو کې د رایه ورکولو مرکزونه پرانیزي تر څو وکړای شي په انتخاباتو کې برخه واخلي.

په پاکستان، ایران، تاجکستان، مسکو او هند کې د افغانستان د مهاجرینو په لسګونو تنو استازو په کابل کې د خپلې غونډې پرمهال وویل، دوی چمتو دي چې په راتلونکو ولسمشریزو او د ولایتي شوراګانو په ټاکنو کې ګډون وکړي.

دوی د ټاکنو له خپلواک کمیسیون څخه غواړي چې په یادو هیوادونو کې د رایې ورکونې او د رایې ورکوونکو د نوم لیکنې مرکزونه پرانیزي. هغوی پر حکومت غږ وکړ چې د ټاکنو پر کمیسیون فشار واچوي تر څو دوی ته په را روانو ټاکنو کې د ګډون زمینه برابره کړي.

د هند په ډهلي ښار کې د افغان کډوالو یوې استازې روزا بارکزۍ وویل: «موږ له دولت څخه دا غوښتنه لرو چې په بهر کې موږ ته د رایه ورکولو زمینه برابره کړي، له هغه پرته به موږ له خپل حق څخه محرومه شوي یو. دا زموږ یو مسلم حق دی.»

د افغانستان د حکومت ارقام ښيي چې دمګړۍ شاوخوا څلور نیم میلیونه افغانان په بهرنیو هیوادونو کې ژوند کوي چې د دغو کسانو ډیره برخه په ګاونډيو هیوادونو ایران او پاکستان کې میشت دي.

معترضو افغان کډوالو په دغه غونډه کې دوی ته د رایه ورکولو د کارتونو د ویش د مرکزونو د پرانیستلو غوښتنه هم درلوده. دا په داسې حال کې ده چې اوس مهال په ټول هیواد کې د ټاکنو له پاره د رایه اچونې د کارتونو د ویش لړۍ روانه ده.

د پاکستان د شمشتو د کډوالو په یوه پنډغالې کې د افغان مهاجرینو استازي سیدا جان، بیا وویل چې د دوی د کمپ په زرګونو تنه اوسیدونکي لیواله دي چې په ټاکنو کې برخه واخلي. د هغه په وینا ځيني يې کارتونه لري اونور یې بیا کارتونو ته انتظار باسي: «زموږ ډیری مهاجرین چې د پاکستان په هر کمپ کې دي په ټاکنو کې د ګډون غوښتنه کوي.»

خو د افغانستان د ټاکنو خپلواک کمیسیون بیا وایي، چې د دې کار د ترسره کولو له پاره ډیرې بودجې ته اړتیا ده. د کمیسیون د دارالانشا مشر ضیاالحق امر خیل په وینا ښایي د ټاکنو خپلواک کمیسیون د بودجې د کمښت له امله په ایران، پاکستان او د نړۍ په نورو برخو کې افغان کډوالو ته د نوم لیکنې د مرکزونو په پرانیستلو ونه توانیږي. هغه زیاته کړه چې سره له دې هم د کمیسیون چارواکي په دې باب په خپل منځ کې سره بحثونه کوي.


دمګړۍ د را تلونکي کال د ولسمشریزو او ولایتي شورګانو ټاکنو ته په هیواد کې دننه تیارۍ په چټکۍ سره روان دی. په پام کې ده چې راتلونکې ولسمشریزي او د ولایتي شورا ګانو ټاکنې به د ۱۳۹۳لمریز کال د وري په ۱۶ نیټه ترسره شي.