1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

برېکسيټ ـ د لندن ښاروال د هسک مقام پر لور

که په ولسپوښتنه کي له اروپايي اتحاديې څخه د بريتانيې د وتلو په پلوي اکثريت رايي واچول سي، نو ښايي د لندن پخوانی ښاروال راتلونکی لومړی وزير وي. ايا بوريس جانسن د لومړي وزير کېدو چانس لري؟

د پنجشنبې د ورځي (د ۲۰۱۶ کال د جون ۲۳مه نېټه) د ولسپوښتني نتايج به وښيي چي ايا بريتانيه به د اروپايي اتحاديې غړی هيواد پاته سي او که به ورڅخه بېل سي. د لندن پخوانی ښاروال بوريس جانسن د زيات وخت راهيسي د دې پلوی دی چي بريتانيه دي له اروپايي اتحاديې جلا سي.

بوريس جانسن حتی د روان کال د جنورۍ په مياشت کي لا اعلان کړی ؤ چي د برېکسيټ يا له اروپايي اتحاديې څخه د بريتانيې د وتلو په حق کي به کامپاين وکړي. د نوموړي د دغه اعلان وروسته په بريتانيه کي د برېکسيټ بحث تغير وخوړ. دا په داسي حال کي چي بوريس جانسن هم په محافظه پالو او هم په عامه محضر کي مينه وال لري. د برېکسيټ په پلويانو کي د جانسن اضافه د دې لامل سوه چي د دغه اړخ وزن تر پخوا زیات سي، دا په داسي حال کي چي تر مخه د برېکسيټ د اړخ پلوي کوونکي سياستوال داسي کسان ول چي زیات نومور نه ول.

د قانع کولو هڅې

ويل کيږي چي لومړي وزير ډېوېډ کېمرون په اونيو اونيو هڅي وکړې چي جانس په دې قانع کړي چي د برېکسيټ پر خلاف کامپاين وکړي. نظرپوښتنو مخکي له مخکي وړاند وينه کړې وه چي که جانسن د برېکسټ پلوي پېل کړي نو به دا د ولسپوښتني يا رېفراندم پر پايلو ښکاره اغېز ولري. په رشتيا همداسي وسوه.

د پوليتيکس په نوم خبري انټرنټپاڼي مرستيال مسؤل مدير آدم بينکوف د بوريس جانسن په هکله وايي چي جانسن ښکاره او روښانه خبري کوي. بېنکوف زياتوي: «هغه بعضي وختونه هغه موضوعات څېړي او ورباندي خبري کوي چي نور سياستوال ورڅخه ډه ډه کوي. که څه چي دا بعضي وخت تاواني هم تماميږي خو د خلکو جانسن نه هيريږي. خلک هغه پېژني او هغه په بريتانيه کي تر ټولو محبوب سياستوال دی.»

يو شمېر کسان وايي چي جانسن د خپل شخصي او سياسي مطلب له پاره د برېکسيټ د پلويانو مشري په غاړه اخيستې. د دغو نظرونو له مخي پخپله جانسن د خپلې سياسي مفکورې له کبله نه بلکه په دې خاطر د برېکسيټ د پلويانو مشري په غاړه اخيستې چي د محافظه پالو په خپل ګوند کي د مشر کېدو خپل چانسونه بهتره کړي.

که بريتانويان په رشتيا هم له اروپايي اتحاديې څخه د وتلو په حق کي اکثريت رايي واچوي، نو به د اکثره اټکلونو له مخي لومړی وزير ډېويډ کېمرون استعفی ورکړي. په داسي يو صورت کي دمګړی د جانسن د لومړي وزير کېدو زښت زيات چانسونه ليدل کيږي. جانسن څوک دی او د هغه د محبوبيت راز څه شی دی؟

جانسن د اروپايي اتحاديې د غړيتوب پر ضد د کامپاين مخکښ سياستوال دی

جانسن د اروپايي اتحاديې د غړيتوب پر ضد د کامپاين مخکښ سياستوال دی

ګټونکې څهره

د دې څخه تر مخه چي جانسن سياست ته مخه وکړي هغه يو بريالی ژورنالست ؤ. هغه د نامتو ورځپاڼو لکه «ټايمز» او «ډېلي تليګراف» له پاره ليکنې کولې او په ۱۹۹۹ کال د محافظه پالې مجلې «دې سپېکټېټر» مسؤل مدير سو. نوموړي په ۲۰۰۱ کال له دغې دندي استعفی وکړه او د پارلمان غړی سو. خو هغه د ورځپاڼو له پاره خپلو ليکنو ته ادامه ورکړه.

جانسن د لندن د ښاروال په توګه د کار پر وخت په رشتيا دومره معاش نه درلود، لکه څومره زياتي پيسې چي يې د ژورنالست په توګه ګټلې. نوموړي ۸ کاله د لندن د ښاروال پاته کېدو وروسته بېرته پارلمان ته مخه وکړه او د ولسي جرګې غړی سو.

جانسن د خپلې خوشکلامۍ له کبله هم زيات شهرت لري. زيات خلک په هغه کي د لوېديځ د نورو سياستوالو په پرتله د زيات رنګين سياستوال څهره ويني. جانسن د بېلګي په توګه د ۲۰۰۵ کال د ټاکنيز کامپاين پر وخت ويلي ول: «که تاسو محافظه پالو ته رايي ورکړئ، نو ستاسو د مېرمنو سينې به لوی سي او تاسو به د بي اېم ډبلو د ايم درې ماډل څښتنان سئ.»

کله چي جانسن په ۲۰۰۸ کال د لندن د ښاروالۍ له پاره انتخابات د کارګر ګوند له کانديد څخه وګټل، نو دا د زیات وخت وروسته د محافظه پالو له پاره لومړۍ لويه بريا وه.

جانسن او کېمرون دواړو له آکسفورد پوهنتون څخه تحصيلي اسناد تر لاسه کړي

جانسن او کېمرون دواړو له آکسفورد پوهنتون څخه تحصيلي اسناد تر لاسه کړي

کمزره کامپايني تګلاره

د هغه باوجوده چي جانسن د خپلو غېر متوقع څرګندونو او خبرو له پاره مشهور دی، د زيات وخت راهيسي داسي اټکلونه کيږي چي هغه به د مشهور پوهنتون فارغ التحصيل ډېويډ کېمرون پر شا کړي او د هغه ځای به ونيسي.

خو يو شمېر کتونکي د جانسن د بريا په تړاو زيات مثبت اټکلونه نه کوي. دغه تنقيد کوونکي د هغه کار او لاس ته راوړنې تر پوښتني لاندي راولي. د بېلګي په توګه کله چي هغه د لندن ښاروال ؤ نو د عامه ترانسپورت کرايي په ډېره چټکۍ جګي سوې او د کارګرو د اتحاديو سره اوږدمهاله لانجې رامنځ ته سوې.

بينکوف وايي چي «کله چي څوک د هغه دوو دورو ته وګوري، نو بايد وويل سي چي هغه زياتي لاس ته راوړنې نه دي درلودلي.» دغه ژورنالست زياتوي: «په وروستي تاکنيز کامپاين کي هغه حتی زياتي ژمني نه وې کړي او کامپاين يې ډېر کمزوره ؤ. په تيرو څلورو کالو کي په ښاروالۍ کي يو ډول د رکود حالت حاکم ؤ. څوک کولای سي چي ووايي چي هغه د بېلګي په توګه نورو شيانو ته لکه کتابونو ليکلو ته زيات وخت درلود.»