1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

بالکان هيوادونه يوازي افغانان، عراقيان او سوريايان پرېږدي

سربستان، کروشيا او مکدونيا له پنجشنبې ورځي راهيسي له خپلو سرحدونو د هر هيواد مهاجر نه پرېږدي چي تير سي. ويل کيږي چي يوازي د افغانستان، عراق او سوريې پناه غوښتونکي اجازه لري چي تر سرحدونو ئې تير سي.

اروپا ته د مهاجرت په اړه نور معلومات دلته لوستلای سئ

په بلگراد کي د ملگرو ملتو د کډالو چارو ادارې (UNHCR) وياندي ميليتا سنجيک ويلي دي چي د بالکانو هيوادونو له لاري به نور يوازي افغانانو، سوريايانو او عراقيانو ته اجازه ورکول کيږي چي تر سرحدونو ئې نورو هيوادونو ته تير سي.

د روان کال له دوبي راهيسي د بالکان هيوادونو له لاري اروپا ته د جنوبي اسيا، منځني ختيځ او افريقا په سونو زره مهاجر رسېدلي دي. د دوی ډېری په آلمان کي د پناه غوښتنه کړې ده.

د مکدونيا پوليسو ويلي دي چي له يادو هيوادونو پرته به نور ټول مهاجر له سرحدونو وشړي. د پوليسو يوه وياند رويترز خبري آژانس ته ويلي دي چي د سرحدونو تړل ئې د هغه کار په غبرگون کي کړي چي سلوانيا چي د اروپايي ټولنی غړی هيواد دئ دې د ورته اقدام اعلان ئې وکړ.

د ملگرو ملتونو وياندي ويلي دي چي سربستان د چهارشنبې په ماښام لا خپل سرحدونه د نورو مهاجرو پرمخ وتړل. سربستان هم ويلي دي چي يوازي به افغانان، عراقيان او سوريايان پرېږدي.

د بالکان هيوادونو ويلي دي چي د مهاجرو په دغه بحران کي ډېر مهاجر د دوی په هيوادونو کي بند پاته سوي.

د سربستان د ټولنيزو چارو وزير الکساندر فولاين، د پنجشنبې په ورځ ويلي دي: «موږ داسي کسان چي ډاډه نه يو چي هغوی به خپل سفر ته ادامه ورکړي، په خپل هيواد کي نه سو پرېښوولای.»

DW.COM