1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

اييتلافي حکومت په لمړنيو 100 ورځو کار کي پاته راغلی دی

سل ورځي کيږي چي په آلمان کي د تور او ژيړ ايتلاف حکومت کوي! تور او ژيړ يې په دې بولي چي د مسيحي او ليبرال ګوندونو د بيرغونو رنګونه تور او ژيړ دي

صدراعظمه انګيلا ميرکل او جارجه وزير ګيدو وستر ويله

صدراعظمه انګيلا ميرکل او جارجه وزير ګيدو وستر ويله

خو کله چي د ايتلاف رسمي تړون باندي خبري کيدې د مسيحي سوسيال ګوند چي آلماني مخفف يي CSU دی، مشر هورت زيهوفر ټينګار پر دي ؤ چي د ايتلاف نوم بايد مسيحي - ليبرال وي . داسي يو نوم چي د هغو ارښتنو ويندويي وکړي چي نوموړي ګوندونه اصولاً ورباندي ايمان لري، خو له خپل ټولنيز ضد مالياتي سياست سره د تور- ژيړ د ايتلاف د نوموړي نوم د ارزښتونو نخښه نښانه هم چا ونه وليدله .

د ليبرال ديموکرات د ګوند مشر، ګيدو وستر ويلي چي په ايتلافي حکومت کي د بهرنيو چارو وزير دی، د خپل ګوند په يوه کلنی غوڼده کي څه موده مخکي له ليبرال پالو څخه حتی د يوه روحي - سياسي بدلون غږ وکړ . خو پوښتنه دا ده چي دغه بدلون کومي خواته درومي؟ د نوي دولتي واکمنۍ په لور ، هغه چي ښاغلی وستر ويلي يې د يو اصل په توګه وړاندي کوي؟ هغه يو دولتي واکمني چي ماليه ورکول يې پکښي ګستاخي ګڼل ! ګستاخي خو لا څه کوې، ګواکي څوک دې چمتو کيږي چي ماليه ورکړي ،لکه دا چي يو ناوړه عمل سرته رسوي .

د ښاغلي وسترويلي د نوي ليبرال تر شعار لاندي د طمطراقونو سره سره، نوي حکومت تراوسه پوري د عمل په ډګر کي څه نه دي ښکاره کړي . د هغه لومړۍ سل ورځي د ايتلافي ګوندونو په خپل منځي شخړو او د خپلو ملاتړ کونکو په خدمت کي تيري شوي ، هغه ملاتړ کونکي چي له ټاکنو څخه مخکي هغو ته د مالياتو د کمولو ژمني شوي وې . د هغو په جمله کي د هوټلونو خاوندان ځانګړی مقام لري، چي ورته د عايداتو د مالياتو د کمولو وعده ورکړ شوې وه .

سربيره پر دې د ميراث د ماليې کمول او د ډيرعايد لرونکو لپاره د مالياتو آسانتياوي، هغه نوري ژمني وې چي دغه اييتلاف کړي وه .

د روغتيايي خدماتو په سياست کي بنسټيز بدلون د مسيحي - ليبرال د ايتلاف د تړون بله ژمنه ده . په خاص ډول د ليبرال ديموکرات يا FDP د حکومت د واکمني په تيرو سل ورځو کي پاته راغلی دی . د تعجب وړ خبره بايد نه وي چي ددغه ګوند محبوبيت ديوې نظرياتي پوښتني له مخي په سلو کي لس ته راټيت شوی دی . خو د دغه ايتلاف ستر اړخ يعني مسيحي ديموکرات او مسيحي سوسيال (CDU/CSU) ګوندونو باندي هم تور لګول کيږي چي د حکومتوالي د تيرو مياشتو څخه يې په اغيزمنه ډول کار نه دی اخيستی، او په خپلوډيرو ژمنو کي پاته راغلي دي . په خاصه توګه هغوی نه دي توانيدلي چي د دولتي پورونو او د اقتصادي کړکيچ له ډنډ څخه د ډوبيدو د مخ نيوي لاره پيدا کړي . د دې پرځای، د چا خبره ليبرال ديموکرات د مسيحي ديموکرات او مسيحي سوسيال ګوندونو په پزه کي کړۍ اچولې او هري خواته يې چه غواړي په خپله خوښه کشوي .

د حکومت مشره، انګلا مرکل اجازه ورکوي چي ليبرال ديموکراتان هر څه چي زړه يې غواړي هغه وکړي، لکه دا چي د ولس او خلکوپه وړاندي هيڅ مسؤليت ونه لري، حال دا چي د حکومت د واګي د اخيستو په وخت کي يې ويلي وه چي دا د «آلمان د ټولو خلکو صدراعظمه» ده.

دا په دې هم ښه خبره ده چي ډيری خلک په دې هيواد کي د يوبل د لاس نيوي ، پيوستون او ټولنيز عدالت د يو سياست پلوي کوي، څرنکه چي يوې ورستۍ نظرياتي پوښتني هم د دې خبري پخلی کړی دی . خو د آلمان فدرالي حکومت د دې خبري پروا هم نه لري . هغه د مالياتو د کمولو پر سياست باندي ټينګارکوي، هغه يو سياست چي اوس يو شمير محافظ پال کارپوهان يې هم غلط بولي .

په خارجي سياست کي د آلمان د نوي ايتلافي حکومت لومړۍ مياشتي د افغانستان د کندز ولايت د يوې هوايي ببمارۍ پر شخړه باندي تيري شوې . داسي يوه شخړه چي د انګلا مرکل د کابينې يو وزير، فرانس يوزف يونګ چي په پخواني حکومت کي يې د دفاع دوزارت مسؤليت پر غاړه درلوده، له خپل نوي مقام څخه استعفاء ته مجبوره کړ.

لنډه دا چي د نوي ايتلافي حکومت د واکمنۍ د لومړي مياشتو لاره ډيره کنډ او کپره وه . آن دا چي د لندن د افغانستان د کنفرانس څخه لږ څه مخکي انګلا مرکل او د هغې درو وزيرانو کابو په يوه وخت کي دري مختلف مطبوعاتي کنفرانسونه ورکړل ،تر څو په اصطلاح د افغانستان په وړاندي د فدرالي حکومت د ګډي ستراتيژۍ پيغام عام خلکو ته ورسوي، دا په خپله د دغه ايتلافي حکومت په دننه کي د نه همآهنګي ښکارندوی دی .

د تبصرې ليکونکی ، بيتينا مارکس په پای کي وايي:

نه ! نه ! د جرمني د نوي ايتلافي حکومت لومړۍ سل ورځي قناعت بخښونکي نه وې . په دې وجه سخته ده چي پر دغه حکومت باندي په راتلونکو درونيمو کلونو کي چي د واکمنۍ موده يې پاته ده، سړی باور او اعتماد وکړي .

بيټينا/ باري حکيم

کتونکی : محمد قاسم نوري