1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

اروپا ته مهاجرت

ايمنستي: مهاجري ښځي جنسي زهيرول سوي

د بخښني نړيوال سازمان په يوه نوي رپوټ کي راغلي دي چي ښځي له خپلو هيوادونو څخه د جگړو له کبله تښتي خو دوی د مهاجرت پرمهال جنسي زهيرول کیږي او زورزياتی ورسره کيږي.

د بخښني نړيوال سازمان (ايمنستي انترنيشنل) د يوه راپور له مخي اروپا ته راغلي مهاجري ښځي د مهاجرت پرمهال د جنسي زهيروني او زورزياتي څخه شکايت کړی دئ.

په دغه راپور کي راغلي دي چي د مهاجرت پرمهال ښځي او نجوني د جنسي زهيروني او سختو کړاونو څخه شکايتونه کړي دي.

د بشري حقونو فعالانو پر حکومتونو او مرسته رسوونکو سازمانونو نيوکه کړې ده چي د مهاجرو ښځو په خوندي ساتلو کي پاته راغلي دي. په راپور کي تر ټولو بد وضعيت په يونان، بالکان هيوادونو او حتی آلمان کي ښوول سوی دئ.

د بخښني د نړيوال سازمان په راپور کي راغلي دي چي دوی په ناروې کي ۴۰ ښځي او نجوني پوښتلي دي او نژدې ټولو له ترکيې څخه يونان او بيا وروسته د بالکان هيوادونو له لاري شمالي اروپا ته د سفر پرمهال «خوندي نه وې» او زورزیاتی ورسره سوی دئ.

د بخښني نړيوال سازمان يوې کارکوونکي تيرانا حسن، ويلي دي: «دا ډېر د شرم ځای چي د جنگ له ويري راتښتېدلي ښځي په اروپا کي خونديتوب نه لري.»

څو ښځو ويلي دي چي دوی ته د مهاجرت سفر پرمهال د کاليو او په کښتيو کي د ځای ورکولو په بدل کي د جنسي اړيکو وړانديزونه سوي دي.

دوی ويلي دي چي په اروپا کي د مهاجرو په کمپونو کي به په کوټو کي نه بيدېدلې او تر شنه آسمان لاندي به ئې شپه تيرولې، ځکه دوی به د خونديدتوب احساس کاوه. دوی د قاچاقبرانو، امنيتي ساتونکو او نارينه مهاجرو له خوا جنسي زهيرول سوي دي.

د بخښني نړيوال سازمان، د ښځو او ماشومانو د ساتني له پاره د اقداماتو غوښتنه کړې ده. دوی ويلي دي چي ښځي او ماشومانو بايد د بيدېدو جلا خوني ولري.

DW.COM