اوباما روسي هکران په غچ اخيستني وګواښل | آلمان او نړۍ | DW | 16.12.2016
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

اوباما روسي هکران په غچ اخيستني وګواښل

بارک اوباما نه غواړي چي د روسي هکرانو سايبري بريدونه بې جوابه پرېږدي. نوموړي ويلي چي امريکا بايد د بهرني حکومت له لوري په ټاکنو کي د لاسوهني په برخه کي غبرګون وښيي.

د امريکا متحده ايالاتو ولسمشر باراک اوبا په زغرده د روسي هکرانو د سايبري بريد د جواب ويلو او غچ اخيستلو ګواښ کړی دی. اوباما ويلي: «زه فکر کوم چي په دې کي هيڅ شک نسته چي موږ بايد غبرګون وښيو، کله چي يو بهرنی حکومت زموږ د ټاکنو پر خپلواکمنۍ باندي د بريد هڅه کوي.»

اوباما د (NPR) په نوم رسنۍ سره د خبرو پر وخت زياته کړې: «خو موږ به د دغه غبرګون وخت او ځای پخپله تعين کړو. د دغه کار يوه برخه به روښانه او په عامه محضر کي وي او يوه برخه به يې نه وي.»

خو باراک اوباما د امريکا د بهرنۍ استخباراتي ادارې (CIA) ادعا نه ده تکرار کړې چي له مخي يې روسيې د سايبري بريدونو په مرسته غوښتل له دونالد ترمپ سره مرسته وکړي چي د ولسمشرۍ انتخابات وګټي.

اوباما د خپلو خبرو پر وخت له دې څخه هم ډډه وکړه چي په دغو سايبري بريدونو کي پر دونالد ترمپ او يا د هغه پر ډله د لاس لرلو تور پوري کړي. خو اوباما له دې څخه شکايت وکړ چي د «روسي هکري بريدونو له کبله د دونالد ترمپ په پرتله د هېلري کلنټن کامپاين زياتې ستونزې لرلې.»

ايا ترمپ ته ګټه ورسېده؟

په مياشتو مياشتو د هېلري کلنټن او د هغې د بنسټ پر ضد د ايميلونو د لانجې په تړاو په عامه محضر او انټرنټ کي د تورونو موضوع توده وه. د اوباما په وينا ترمپ د «ديموکرات ګوند پر ضد د سياسي افواؤ» د دغې موضوع له پايلو څخه په سياسي توګه ګټه واخيستله.

پتېيل سوې ده چي د اوباما دغه مرکه د جمعې په ورځ (د ۲۰۱۶ کال د دسمبر ۱۶مه نېټه) خپره سي.  اوباما په دغه مرکه کي زياته کړې چي د راتلونکي کال د جنوري مياشتي پر۲۰ نېټه به دونالد ترمپ ته د ولسمشرۍ دفتر تر سپارلو مخکي لا د هکري بريدونو په تړاو د سپيني ماڼۍ يو راپور وړاندي کول يې خپل ځان ته يو هدف ټاکلی دی.

د پوتين په امر؟

د (NBC News) په نوم رسنۍ تر دې دمخه په خپل يوه راپور کي ويلي ول چي د روسيې ولسمشر ولاديمير پوتين پخپله لارښوونه کړي وو چي د هېلري کلنټن له هک سوو برېښناليکونو سره بايد څرنګه چلن وسي.

يادي رسنۍ په خپل دغه راپور کي د دوو لوړ پوړو استخباراتي چارواکو په حواله ويلي ول چي پوتين د هېلري کلنټن پر ضد دغه عمل د غچ اخيستلو په توګه کړی وو. د راپور له مخي، ځکه چي کلنټن د امريکا د بهرنيو چارو د وزيري په توګه په ۲۰۱۱م کال د روسيې د ټاکنو قانونيت تر سوال لاندي راوستلی وو.

د دغې رسنۍ د راپور له مخي وروسته پوتين دغه سايبري او هکري بريدونه پراخ کړل چي په مرسته يې وکولای سي د امريکا متحدو ايالاتو د انتخاباتو نظام اختلاسګر وښيي.

خو د روسيې د ولسمشر وياند دېميتري پېسکوف، دغه تورونه رد کړل او هغه يې «د خندا وړ او احمقانه» وبلل.

له بله اړخه د امريکا راتلونکي ولسمشر دونالد ترمپ هم دا خبره د شک وړ وبلله چي ګويا د ديموکراتانو پر ضد د هکري بريدونو تر شا دي د روسيې لاس وي. د جمهوري غوښتونکي ګوند سياستوال ترمپ پر دغه موضوع د امریکا متحدو ايالاتو د استخباراتي ادارو معلومات د شک وړ بللي.

پر ورته موضوع یو انځوريز البوم زموږ له آرشيف څخه (08.07.2013):


 

DW.COM