امريکايي ځواکونو په لوگر کي ۱۰ افغان عسکر وژلي | افغانستان | DW | 20.07.2015
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

امريکايي ځواکونو په لوگر کي ۱۰ افغان عسکر وژلي

افغان چارواکي وايي چي په لوگر ولايت کي د افغان عسکرو د تلاښۍ پر يوې پوستې باندي د امريکايي ځواک په هوايي بمبار کي نزدې ۱۰ عسکر وژل سوي دي. پېښه په برکي برک ولسوالۍ کي سوې ده.

د برکي برک ولسوال محمد رحيم امين د فرانسې خبري آژانس ته ويلي دي: «نن دوشنبه سهار۶ بجې د امريکايي ځواکونو دوو څرخۍ الوتکو په برکي برک ولسوالۍ کي پر يوې پوستې باندي يرغل وکړ.»

هغه زياته کړې ده: «د تلاښۍ پر دې پوستې باندي په هوايي يرغل کي ۱۴ افغان عسکر وژل سوي دي.»

يوه امريکايي چارواکي ويلي دي چي دی «په لوگر ولايت کي د نن ورځي د امريکايي ځواکونو د پيښي په اړه خبر دئ.» هغه ويلي دي چي «په دې اړه څېړني رواني دي.»

د لوگر د والي وياند دين محمد دروېش هم په دغه پېښه کي د وژل سوو عسکرو شمېر تائيد کړی دئ.

هغه ويلي دي: «هدف د تلاښۍ يوه پوسته وه نه يوه مشکوکه سيمه.» هغه زياته کړې ده: «پر دغي پوستې باندي چي امريکايي ځواکونو هوايي يرغل کړی دئ، د افغانستان بيرغ رپېده.»

د تيرکال په دسمبر مياشت کي هم په برکي برک ولسوالۍ کي د ناټو ځواکونو په يوه هوايي بريد کي پنځه تنه ملکيان ووژل سول او شپږ کسان نور ټپيان سول.

په افغانستان کي د بهرنيو ځواکونو د ۱۳ پوځي ماموريت پرمهال په هوايي يرغلونو کي د ملکي کسانو مرگ ژوبله تر ټولو جنجالي موضوع وه.

DW.COM