1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

المان په ترکيه کي «پاتريوت» ماموريت پای ته رسوي

دا په وروستیو کلونو کی د الماني پوځ لپاره یوه ډیره هیجاني قومانده وه. هغه دا چي «په ترکیه کي د پاتریوت راکټي دفاعی سیسټم» ماموریت په غاړه واخلي. خو اوس د المان دفاع وزارت ویلي دي چي دغه ماموريت به ختم کړي.

المانۍ مجلې «شپیگل انلاین» په یوه رپوټ کي ليکلي دي چي د المان حکومت په دننه کي په تیرو څو ورځو کي په محرمانه ډول سره توافق سوی دی، چي د ترکيې په جنوب کي ځای پر ځای سوي د «پاتریوتدفاعي سیسټم» او د هغه سره یوځای تقریبأ۲۶۰ الماني عسکر به په راتلونکو میاشتو کی راوباسي.

دغه خبره د المان د دفاع وزارت یوه ویاند هم تایید کړې ده. د وزرات په وینا به دغه مؤقت ماموریت چي موده یې د ۲۰۱۶ م کال د جنوري میاشتي په اخره کي پای ته رسیږي، نور تمدید نه سي.

«شپیگل انلاین» همدارنگه لیکلي دي چي حکومت همدا نن شنبه (د ۲۰۱۵کال د اګست ۱۵مه نېټه) لا غواړي، پارلمان ته د خپل دې تصمیم څخه خبر ورکړي. هغه د دې له پاره چي نور د ناټو په چوکاټ کي هغه ماموریت چي پر ترکيې باندي د سوريې څه د احتمالي راکټي حملو د دفاع په خاطر موجود ؤ، نور نه تمدیدوي. د «پاتریوت» دغه دفاعي سیسټم د ترکيې په غوښتنه دوه نیم کاله دمخه د سوریې د سرحد څخه تقریبآ ۱۰۰ کیلوتره لیري په ترکيه کي مستقر سوی ؤ. دغه ماموریت ته په اول واري د ۲۰۱۶ م کال د جنورۍ میاشتي تر ۳۱ مي نیټي پوري معاد ټاکل سوی ؤ.

خو د عراق په شمال کي د کردي ياغيانو د گوند PKK پرمورچلونو باندي په تیرو څو ورځو کي د ترکيې د سختو نظامي عملياتو له کبله په جرمني کي پر دغه ماموریت باندي سخت سیاسي بحثونه رامنځته سول. حتی د حکومتي اییتلاف له خوا خو دا غوښتنه طرح سوه، چي دغه ماموریت به په هغه صورت کي قطع کړي، چي که د ترکيې هوايي قواوي د PKK پر نظامي اړخ باندي خپلو عملیاتو ته دوام ورکړي. خو د «شپیگل انلاین» د رپوټ له مخي د جرمني حکومت نه غواړي اوسني تصمیم ته په ترکیه کي د تازه وضعیت سره ارتباط ورکړي. د دغه ماموريت د پای ته رسولو رسمي دلیل دا ښودل سوی دی، چي د سوريې څخه پر ترکيې باندي د راکټي حملو خطر نور موجود نه دی.