1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

المان له افغانستان سره هر کال ۴۳۰ میلیونه یورو مرستې کوي

المان به له ۲۰۱۴ کال وروسته د افغانستان د بیارغاونې له پاره هر کال ۴۳۰ ملیونه یورو ولګوي. تر دې مخکي دغه هیواد د افغانستان له امنیتي ځواکونو سره هر کال د ۱۵۰ میلیونه یورو مرستو اعلان هم کړی وو.

د المان د پرمختیایي مرستو وزیر دیرک نیبل، دغه خبره مخکی له دی چی د جمعې په ورځ د اتو صنعتی هیوادونو (G8) د سرمشرییز په لور روان شي په برلین کی وکړه. نیبل وویل: «په لومړي سر کې به موږ خپلې مرستې په اوسنۍ کچه خوندي وساتو.»

تیره اونۍ له افغانستان سره د اوږد مهالو همکاریو د تړون تر لاس لیکولو وروسته د المان صدراعظمې انګلا میرکل، اعلان وکړ چې د افغانستان د ملي پوځ او ملي پولیسو د رزونې د تمویل له پاره په المان هر کال ۱۵۰ ملیونه یورو له افغانستان سره مرسته وکړي.

د افغانستان او المان ستراتیژیک تړون په نهو مادو کې خلاصه شوی دﺉ او د افغانستان ملکي رغونې ته پکښې ځانګړې پاملرنه شوې ده چې دواړه اړخونه یعنی افغان حکومت او د المان فدرالي جمهوریت مکلف کوي چې په دې لاره کې پر خپلو ژمنو ټینګ ولاړ وي.

دغه ملکي مرستې د پوځي مرستو سر بیره افغانستان ته ورکول کیږي. په دې ترتیب نو له ۲۰۱۴ کال وروسته المان په ټولیزه توګه له افغانستان سره هر کال ۵۸۰ میلیونه یورو مرستې کوي.

د امریکا متحده ایالاتو په کمپ دیوید کې د جمعې په ورځ د اتو صنعنی هیوادونو له مشرانو سره تر لیدنې کتنې وروسته، د المان صدر اعظمه انګلا میرکل د یکشنبې په ورځ په شیکاکو کې د ناتو په سرمشرییزه کې ګدون کوي.

په افغانستان کې د ناتو د ماموریت ارزول او دا چې وروسته له ۲۰۱۴ کال څخه د افغانستان امنیتي ځواکونه څرنګه په خپلو پښو باندې ودرول شي، د دغې سرمشرییزې مهمه اجندأ جوړوي.

د غونډې کوربه، ولسمشر بارک اوباما، هڅه کوي چې خپل نور متحدین قانع کړي چې د افغانستان د امینتي ځواکونو د روزنې او تمویل له پاره پراخې مرستې وکړي. ویل شوي دي چې د دې هدف له پاره لږ تر لږه ۴.۱ میلیارده ډالر په کار دي.

آژانسونه/ عبدالباري حکیم
کتونکی: مسعود جهش