1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

افغان پوځ ډېر نور کلونه مرستو ته اړ دئ

په افغانستان کي د امريکايي او ناټو ځواکونو نوي قوماندان ويلي دي، تر هغه وخته پوري چي افغان پوځ په دې توانيزي چي په يوازي سره عمل وکړي ډېر نور کلونه د امريکا متحدو ايالاتو مرستو ته اړتيا لري.

جنرال جان نيکلسون د پنجشنبې په ورځ (۲۰۱۶م کال د جنورۍ ۲۸مه) په واشنگټن کي د امريکا سنا ته وويل چي «افغانان زېږېدلي جنگيالي دي.» خو هغه زیاته کړه چي د پوځ رغول ئې، په ځانگړې توگه د هوايي ځواک برخه کي ډېر وخت غواړي.

هغه د امريکا سنا ته وويل: «له ډېرو پرمختگونو سره سره به موږ په ځينو برخو کي کلونه وخت وغواړو، په ځانگړې توگه د هوايي ځواک په برخه کي.»

هغه دغه راز ويلي دي چي له افغانستان څخه د بهرنيو ځواکونو تر وتلو وروسته د دغه هيواد امنيتي وضعيت نور هم خراب سوی.

نيکلسون چي په افغانستان کي د جنرال کمپبل ځای نيسي او د افغانستان تجريبه لري، سنا ته ويلي دي چي په افغانستان کي د خپلي دندې تر پيلېدو ۹۰ ورځي وروسته به دا وارزوي چي په افغانستان کي مېشت ځواکونه بسنه کوي که نه.

امريکايي جنرال جان نيکلسون

امريکايي جنرال جان نيکلسون

کمپبل ۱۸ مياشتي په افغانستان کي د امریکايي او ناټو ځواکونو د عمومي قوماندان په توگه کار وکړ. هغه د تير مېلادي کال په دسمبر مياشت کي اعلان وکړ چي امريکا نه غواړي په افغانستان کي ځواکونه ډېر کړي.

خو اوباما د تيرکال په اکتوبر مياشت کي ژمنه وکړه چي په افغانستان کي مېشت ۹۸۰۰ امريکايي عسکر به د ۲۰۱۶م کال تر پايه پوري پاته سي، او تر هغه وروسته به دغه شمېر ۵۵۰۰ ته راکښته سي.

د کمپبل له څرگندونو داسي ښکاري چي په افغانستان کي خراب امنيتي وضعيت ته په کتو سره د امریکايي ځواکونو ډېرښت امکان لري.

امريکا متحدو ايالاتو او متحدانو ئې د ۲۰۱۴م کال په پای کي په افغانستان کي خپل پوځي ماموريت پای ته ورساوه او د افغانستان ټول امنيتي مسئوليت ئې افغان امنيتي ځواک ته وسپاره.

له هغه وخت راهيسي په افغانستان کي مېشت امريکايي او ناټو ځواکونه د افغان امنيتي ځواک روزنه پر غاړه اخيستي، هغوی ته سلا مشورې ورکوي او د تروريزم پر وړاندي مبارزه کي ئې ملاتړ کوي.

خو له وسله والو طالبانو سره په مبارزه کي د افغان امنيتي ځواک د وړتيا په برخه کي اوس هم اندېښنې موجودي دي.