1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

سيمه

افغان سوداګرو ته په چابهار بندر کې ځمکه توزیع شوه

د ایران د چابهار په بندر کې افغان سوداګرو ته د ځمکو په توزیع کولو پیل شوی دئ. ایران په دغه بندر کې افغان دولت ته ۵۰ هکتاره ځمکه ورکړې ده چې افغان سوداګر هلته خپل توکي زيرمه کړي.

افغانستان تر هغه وروسته د یوه نوي بندر د موندلو هڅې پیل کړې چې پاکستان د کراچۍ په بندر کې څو وارې د افغان سوداګرو د تجارتي توکو مخه ونیوله.

د افغانستان د سوداګرۍ وزیر انور الحق احدي، د شنبې په ورځ (د اکتوبر د میاشتې ۲۰مه نیټه) په کابل کې یوه خبري کنفرانس ته وویل تر یوه کال خبرو اترو وروسته اوس ایران دې ته چمتو شوی دی چې د چابهار په بندر کې افغانستان ته ځمکه ورکړي.

ښاغلي احدي وویل: «هغه سوداګر چې غواړي په چابهار کې ځمکه واخلي، د هغوی له پاره شرایط ډیر ښه دي. هر کال د یوه متر مربع ځمکې کرایه ۲۵ افغانۍ ده او دا ځمکه د پنځوسو کلونو له پاره افغانستان ته ورکړل شوې ده.»

د احدي په خبره که افغان سوداګر لا ډیرې ځمکې ته هم اړتیا ولري نو د چابهار اداره هغوی ته د ځمکې ورکولو ته چمتو ده.

تر اوسه پورې د چابهار په بندر کې یوازې لس هکتاره ځمکه افغان سوداګرو ته توزیع شوې ده خو د افغانستان د سوداګرۍ وزارت وایي چې هغوی ته په کافي اندازه ځمکه ورکړل شوې ده.

پر ایران باندې بندیزونه

افغانستان په داسې وخت کې په ایران کې د افغان سوداګرو له پاره آسانیتاو برابروي چې په وروستیو وختونو کې پر دې هیواد باندې د امریکا او اروپايي ټولنې اقتصادي بندیزونه تر بل هر وخت ډیر سخت دي.خو د افغانستان د سوداګرۍ وزیر وویل چې پر هغو توکو باندې چې د ایران له لارې افغانستان ته رسیږي کوم بندیز نه وضع کیږي. هغه زیاته کړه:

«موږ کومه ستونزه نه وینو چې افغان پانګوال دې د چابهار په بندر کې پانګونه و نه شي کولای او د دې هیواد له ترانزیت څخه کار واخلي. موږ په دې برخه کې کومه ستونزه نه وینو.»

له دې سره نو اوس افغان سوداګر د نیمروز د ولایت له لارې خپل تجارتي توکي افغانستان ته راوړي. تر دې مخکې افغان سوداګرو د پاکستان له لارې افغانستان ته خپل توکي رسول. که څه هم ښايي د ایران لار لنډه او کم مصرفه وي خو بیا هم داسې اندیښنې موجودې دي چې کیدای شي طالبان د افغانستان په نیمروز، کندهار او هلمند ولایتونو کې د سوداګرو له پاره ستونزې رامنځ ته کړي.

دا په داسې حال کې ده چې ښاغلی احدي وویل چې د امنیت موضوع کومه نوې خبره نه ده. هغه زیاته کړه: «د امنیت خبره کومه نوې موضوع نه ده ځکه اوس هم موږ د بندر عباس له لارې افغانستان ته ډیر واردات لرو.»

سید عبید چې یو افغان سوداګر دی وایي چې د چابهار بندر به افغان سوداګرو ته ډیرې اسانتیاوې رامنځ ته کړې. هغه زیاته کړه: «د چابهار او کابل تر منځ واټن د کراچې او کابل په پرتله کم دی. که دغه پروژه کامیابه شي د افغانستان د خلکو او سوادګرو له پاره به ډیره ګټه لري.»