1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

افغانستان کې په روان میلادي کال کې ۲۱۲ زره کسان بې ځایه شوي

ملګرو ملتونو د سه شنبې په ورځ ویلي دي چې په افغانستان کې د روانو شخړو او جګړو له کبله د روان میلادي کال له پیل راهیسې له ۲۱۲ زره څخه زیات افغانان خپلو کورنو پریښودو ته اړ شوي شوي دي.

په افغانستان کې د بشري مرستو همغږي کوونکي دفتر وايي چې د ۲۰۱۷م کال د جنورۍ میاشتې راهیسې په دې هیواد کې شاواخوا ۲۱۲ زره او ۴۳۹ کسان خپلو مینو او کورنو پریښودو ته اړ شوي او د هیواد دننه بې ځایه شوي دي.

د ملګرو ملتونو له خوا په دې خپاره شوي تازه رپوټ کې راغلي دي چې د افغانستان له ټولو ۳۴ ولایتونو څخه له ۳۰ ولایتونو یې داسې رپوټونه ترلاسه کړي چې په کې په اجباري توګه بې ځایه کیدل پیښ شوي دي.

د ملګرو ملتونو د دې رپوټ په حواله د جګړو له امله د بې ځایه کیدو زیاتره پیښې د افغانستان د شمالي ولایتونو په ولسوالیو او کليو کې رامنځ ته شوي چې د ټولو بې ځایو شوو کسانو کابو ۴۱ سلنه جوړوي.

بل لوري ته بیا د افغانستان جګړه ځپلي سویلي او سویل ختیځو ولایتونو کې د بې ځایه شویو کسانو شمیر ۲۲ سلنه ښوول شوی دی چې د تاوتریخوالي او جګړو له امله خپلو کورنو پریښودو ته اړ شوي دي.

سربیره پر دې، تیر میلادي کال په افغانستان کې د جګړې د دوام له امله ۶۶۰ زره  ملکي کسان د بې ځایه شوو کسانو په توګه ثبت شوي وو. د ۲۰۱۷م کال په پیل کې ملګرو ملتونو ویلي وو چې د شخړو د دوام او پراخیدو له امله ښايي ۴۵۰ زره نور افغانان هم د بې ځایه شویو کسانو او کورنیو په شمیر کې ور زیات شي.

پر ورته موضوع یو انځوریز البوم: 

DW.COM