1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

افغانانو ته د بگرام زندان سپارلو پر سر نوې موافقې وشوه

افغانانو ته د بگرام زندان د مسئولیتونو د سپارلو له پاره یوه نوې نیټه وټاکل شوه. دا ځل د امریکا د دفاع وزارت اعلان کړی دی چې دوشنبې په ورځ به د دې زندان مسئولیتونه افغانانو ته وسپاري.

In this March 23, 2011 photograph, Afghan detainees, seen through a mesh wire fence, prepare for noon prayers inside the Parwan detention facility near Bagram Air Field in Afghanistan. More than a dozen detainees who were picked up outside of Afghanistan have been cleared for release by review boards but are still in the prison, according to an estimate by the Human Rights First nonprofit international organization. (Foto:Dar Yasin/AP/dapd)

Afghanistan US Stützpunkt Bagram

د امریکا متحده ایالاتو د دفاع وزارت (پنتاگون) د شنبې په ورځ وویل چې له افغان حکومت سره د بگرام زندان د مسئولیتونو د لیږدولو په اړه یوې موافقې ته رسیدلي دي. تر دې دوې اوونۍ مخکې افغان او امریکايي چارواکي پر دې خبره نه سره جوړیدل چې آيا امریکا د ځیني بندیانو د آزادیدو مخه نیولای شي او که نه.

د یوه لوړپوړي امریکايي چارواکي په خبره ددغې موافقې یوه مهمه برخه دا ده چې افغانان باید داسې یو سیستم رامنځ ته کړي چې له مخې یې د بگرام له زندان څخه داسې بندیان آزاد نه شي چې د امریکا له پاره خطرناکه بلل کیږي.

په موافقه کې داسې یو شرط هم شامل دی چې له مخې دواړه اړخونه د اختلافاتو په صورت کې سره یو ځای کار کوي چې هغه له منځه یوسي. دغه امریکایي چارواکي د موافقې په اړه د نورو معلوماتو له ورکولو څخه ډډه وکړه او ویې غوښتل چې نوم یې وا نه خیستل شي.



د دوشنبې په ورځ افغان ځواکونو ته د پروان زندان د مسئولیتونو سپارل، افغانانو ته د ټول افغانستان د امنیتي مسئولیتونو د لیږدولو د بهیر یوه مهمه برخه ده. په پلان کې ده چې تر ۲۰۱۴ کال پورې ټول بهرني جنگي ځواکونه له افغانستان څخه ووځي او د دې هیواد ټولې امنیتي چارې پخپله افغانانو ته وسپاري.

تر دې مخکې افغانانو د دغه مرکز د تسلیمیدو غوښتنه کړې وه، خو امریکايانو بیا له دې کبله اندیښنه لرله چې نه شي له دې زندان څخه داسې بندیان آزاد شي چې د امریکا متحده ایالاتو امنیت ته گواښ رامنځ ته کړي. په دې اړه ولسمشر کرزي او د امریکا متحده ایالاتو د دفاع وزیر هم خبرې کړې وې.

یوه امریکايي چارواکي ویلي دي چې د افغان او امریکايي لوړپوړو چارواکو یو پلاوی به د زندانیانو له خوا د احتمالي گواښونو د رامنځ ته کیدو په اړه خبرې وکړي.

اوس مهال افغانان د بگرام زندان مدیریت کوي خو امریکایان کولای شي چې هر وخت د یوه زنداني د آزادیدو مخه ونیسي. هغه بنديان چې د امریکايانو له خوا نیول شوي دي هغوی د حقوقي دعوا حق نه لري.

په همدې حال کې د امریکا د دفاع وزرات ویاندې جورج لیتل د ولسمشر کرزي د هغو څرگندونو هرکلی وکړ چې د زندان مسئولیتونه په یوه داسې شېوه سره افغانانو ته وسپارل شي چې د امریکا او افغانستان گټو ته تاوان و نه رسوي.

تیر اوونۍ د امریکا د دفاع وزیر له ولسمشر کرزي سره خبري وکړې او پر دې خبره یې موافقه وکړه چې د بگرام زندان موضوع د یوې اوونۍ په موده کې حل کړي. په افغانستان کې د بهرنیو ځواکونو عمومي قوماندان جنرال دانفورد، هم د دغي شخړي د حلولو پر سر کار کاوه.

د بگرام زندان د مسئولیتونو د لیږدولو موضوع د افغان او امریکايي چارواکو تر منځ اړیکې یو څه خړې کړې دي. د دغه زندان د مسئولیتونو د لیږدولو نیټه تر دې مخکې څو واري ځنډول شوې وه.

DW.COM