1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

اسرائیلو پر غزې باندې ځمکنی برید پیل کړ

تر یوه لنډ اوربند وروسته اسرائیلو د پنجشنبې په ماښام پر غزې باندې د ځمکې له لارې له درنو وسلو سره برید وکړ. ویل شوي چې د دغې حملې هدف د حماس د توغنديو زیرمې او هغه تونل دی چې فلسطینانو پر اسرائیلو د برید له پاره ایستلی.

د اسرائیلو د پوځ یوه ویاند وویل: «د فلسطیني تندلاري سازمان حماس پر ضد د بريدونو یو نوی پړاو پیل شو.» نوموړي زیاته کړه چی له هوا، سمندر او ځمکې څخه د لسو ورځو بریدونو په تعقیب، اوس وضعیت دې مرحلې ته ورسید چې پوځ په ځمکنۍ حملې لاس پورې کړي. د اسرائیلي پوځ د وینا له مخې هدف دا دی چې د اسراییلي اتباعو ژوند محفوظ وساتل شي او په غزه کې د حماس د تندلارې ډلې «د ترور بنسټیز تأسیسات» ویجاړ شي. حماس له څو کلونو را په دې خوا په غزه کې حکومت کوي.

حماس د اسرائیلو د ځمکني برید پر وړاندې گواښ کړی

د اسرائیلو د صدراعظم بنیامین نیتانیاهو، د دفتر له خوا ویل شوي دي چې د اسراییلو د امنیت کابینې تر هغه وروسته د ځمکني برید پریکړه وکړه چې حماس د مصر په مینځگړیتوب د اوربند یو پلان رد کړ. د اسرائيلي پوځ د وینا له مخې د هغه ځواکونو پر غزې باندې له جنوب، شمال او ختیځ څخه حملې پیل کړې دي.

د دی ستر یرغل له پاره اسرائیلو ۸۰۰۰ احتیاط سرتیري هم راجلب کړي دي. دغه تصمیم د اسرائیلو حکومت له دې مخکې منظور کړی وو. له دې سره د اسرائیلو د پوځ شمیر ۷۰ زرو ته رسیږي. حماس په خپل وار سره گواښ کړی دی چې اسرائیل به د خپل ځمکني یرغل له پاره «ډیر لوړ تاوان ورکړي».

د اسرائیلو د حملو یو سترهدف هغه یو تونل دی چې حماس له غزې څخه اسرائیلو ته ترځمکې لاندی ایستلی دی. د پنجشنبه په ورځ د اسرائیلو پوځ وویل چې د دغه تونل له لارې يې اسرائیلو پر یوی سیمی باندې د فلسطینیانو د برید مخه نیولې ده. د اسرائیلود پوځ یوه ویاند وویل چې په دې پیښه کې ۱۳ وسلوال کابو ۲۵۰ متره د اسراییلو خاورې ته ننوتی وو.

ویل شوي دي چې د اسرائیلو هوایي ځواک په دې هیواد کې د نوموړي تونل خوله بمباری کړې ده. او په دې ډول یې د «کیبوز سوفا» په نامه سیمه کی پلان شوې حمله شنډه کړه. اسرائیل له دغه تونل څخه په دې وجه هم ویره لري چی فلسطینیان کولای شي اسرائیلو ته ننوځي او د خپلو فلسطینی بندیانو د خوشی کولو په موخه اسرائیلی اتباع اختطاف کړي.

د تشدد دغه نوی پړاو تر هغه وروسته پیل شو چې د یوه اوربند له پاره هیلې پیدا شوې. دواړو اړخونو د ملگرو ملتو په وړاندیز یو پنځه ساعته اوربند مراعات کړ ترڅو د غزې بی وزلو او اړو خلکو ته د مرستې توکي ورسول شي. یوه شپه مخکی له هغې په قاهره کې د اسرائیلو او د حماس د مرکچینانو لومړۍ غیر مستقیم خبرې اترې پای ته ورسیدې. آن د نوموړي پنځه ساعته اوربند په ترځ کې هم له غزې څخه په ځینو لمسونو لاس پورې شو. فلسطینی زور پالونکو له غزې څخه د اسرائیلو د ایشکول پر سیمه باندې څو هاوانونه وتوغول. د اسرائیلو د پوځ د شمیرنې له مخې د اوربند له پای څخه سمدلاسه وروسته د حماس د سازمان پوځي څانگې ۱۰۰ توغندي پر اسرائیلو وتوغول.

د مرگژوبلې لوړه کچه

د فلسطینی حملو په ځواب کې اسرائیلي پوځ پر غزې باندې خپل بریدونه تند کړل. د فلسطینینانو د ژغورنې د چارواکو د وینا له مخې د لس ورځو را په دې خوا د اسرائیلو په حملو کې لږ تر لړه ۲۴۰ فلسطینان وژل شوي او ۱۸۰۰ نور ټپیان دي. حماس له غزی څخه تر اوسه پورې ۱۳۰۰ توغندي پر اسرائیلو باندې توغولي دي. د اسرائیلو د وینا له مخې په دغو حملو کې یوازې یو اسرائیلي وگړی وژل شوی دی. د «YNETNEWS» د انترنتي پاڼې د رپوټ له مخې اسرائیلی توپخانو او جنگي څرخي الوتکو د غزې په تراړې کې د «بیت حنون او بیت لاهیه» سیمو باندې ډزې وکړې. د فلسطین د ژغورنې د چارواکو د معلوماتو له مخې په دغو بریدونو کې لږ تر لږه درې تنه چې په کې یو ماشوم هم شامل وو، ووژل شول.

فلسطیني ژغورونکي کارکونکي وایي چې د تیرو لسو ورځو په ترڅ کې د اسرائیلو په حملو کی تر اوسه پوری لږ تر لږه ۲۴۰ فلسطینینان وژل شوي او ۱۸۰۰ نور ټپیان دي. د اسرائیلو د پوځ د شمیرنی له مخې د حماس ریدکالې ډلې پر اسرائیلو باندې ۱۳۰۰ توغندي توغولي دي چې په هغو کې یو اسرائیلی وژل شوی دی. د اسرائیلو او حماس تر منځ دغه نوې نښتی د درې اسرائیلي ځوانکیانو د اختطاف او مړینی او د یو فلسطینی ځوانکي چی ویل کیږی د اسرائیلی ځوانکیانو د وژلو په بدل کې ژوندی وسوځول شو، پیل شوې.

DW.COM