1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

ارگ: کرزی او سينگ پر سترتيژيک تړون خبري کوي

افغان ولسمشر حامد كرزى به هند ته په راتلونكي سفر كي چي ممكن سبا پيل سي، له هند سره د ستراتيژيك تړون پرلاسليكولو خبري وكړي. دغه ټکي د ولسمشرۍ ماڼۍ يوي سرچيني نن دوشنبه د اوکتوبر دريمه دويچي ويلي ته وکړ.

افغان ولسمشر حامد کرزی او من موهن سينگ

افغان ولسمشر حامد کرزی او من موهن سينگ

دغه تړون به د هغه تفاهم ليك له مخي لاسليك سي، چي په تيره می مياشت كي د كابل د سفر پرمهال د هند صدراعظم من موهن سينګ له ولسمشر كرزي سره په كابل كي لاسليك كړى وو.

هند له افغانستان سره د لويو مرستندويو هيوادونو په کتار کي راځي، چي د ملک په سويل او سويل ختيځو ولايتونو کي يې دمګړۍ  ګڼ شمير پروژې تر کار لاندي دي.

خوهغه څه چي له کابل سره د هند د دوستۍ له امله افغانستان ته خطر پيښ کړی، هغه د پاکستان مداخله ده.

اسلام آباد څو څو ځله له هند سره د افغان دولت نږدې والی په خپل زيان بللی هغه ادعا چي نه يې هند او نه يي هم کابل مني.

رپوټونه وايي د ډهلي او کابل تر منځ په دغه تړون كي پر نورو مسالو سربيره د افغان ځواكونو روزل او تمويلول هم شامل دي، خو د داسي مرستو څرنګوالى به د افغان حكومت په خوښه ټاكل كيږي.

د ولسمشرۍ ماڼۍ د وياند مرسيتال سيامک هيروي هم دا ومنله چي ولسمشر کرزي به د هند له لومړي وزير من موهن سنګ سره د افغان پوځيانو په تجهيز خبري وکړي.

ويل کيږي د هند په پوځي اكاډيميو كي افغان امنيتي ځواكونه روزل كيږي او ممكن د دغه تړون له مخي هند ته نور رول هم وركړل سي، چي د افغان پوليسو په روزلو كي ډيره مرسته وكړي.

د كابل- ډيلي ستراتيژيك تړون به اقتصادي، سياسي او انساني همكاريو اړخونه هم ولري، چي له څو كاري غونډو وروسته به لاسليك سي.

د سياسي چارو يو شمير کارپوهان له افغانستان سره د هند اړيکي دوستانه او ريښتيني ارزوي.

د سياسي چارو مبصر او د کابل د حقوقو او سياسي علومو د پوهنځي استاد فاروق بشر په دې  اند دی، چي هند له کلونو راهيسي له افغانستان سره اساسي اړيکي لري او تل يي د افغانستان له مرکزي حکومتونو سره مناسبات ګرم ساتلي دي.

ښاغلي بشر د کابل او نوي ډهلي تر منځ د ستراتيژيک تړون پر سر هوکړه د افغانستان د اوږد مهالي ثبات او پرمختګ لپاره يو اړين ګام بولي.

نوموړی وايي هند تل د افغانستان د ښې ګڼي لپاره کار کړی او هيڅ کله يي هم د افغانستان د نورو ګانډيانو په څير مغرضانه دريځ نه درلود.

موهن سينګ د كابل د تير سفر پرمهال هم ژمنه وكړه، چي له افغانستان سره به هراړخيزي مرستي كوي.

نوموړي شاوخوا يو کال دمخه د افغانستان د پارلمان د شپاړسمي دورې د پرانيستي په مراسمو کي برخه اخيستي وه.

يو شمير ولسي افغانان هم له خپل دولت سره د هند اړيکي په  ګټه بولي.

د کابل پوهنتون د حقوقو د پوهنځي د ديپلوماسۍ د برخي زدکړيال شيراحمد طاهري دويچه ويله ته وويل، چي له هند سره د افغانستان اړيکي په ښه پړاو کي دي او د کابل دولت بايد له دغو اړيکو څخه د خپلو سيمه ييزو د ښمنانو پر ضد په ښه توګه ګټه پورته کړي.

نوموړی وايي، پاکستان چي د هند اټومي دښمن دی له افغانستان سره هم دښمني پالي خو که چيري کابل او نوی ډهلي لاس پر لاس د دغه غليم په وړاندي ديپلوماتيکي فشاري پاليسي پر مخ بوزي کيدای سي، چي د نړۍ په کچه دغه ملک منزوي کړي.

دمګړۍ د هند هيواد د افغانستان د روغتيا، سړکونو، عامه تاسيساتو او ټولنيزو چارو په رغولو کي په افغانستان کي د سلګونو مليونه امريکايي ډالرو په لګښت ګڼي پروژې ترلاس لاندي لري.

ميرويس جلالزی/ کابل

کتونکی: نجيب الله زيارمل

DW.COM