1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

اروپا د فلسطين د خپلواکۍ پر غوښتنه چوپه ده

محمود عباس څو مياشتي تر مخه لا ويلي ول چي د 2011 میلادي کال د سپتامبر په مياشت کي به ملگرو ملتونو ته عارضه وړاندي کړي چي فلسطين د خپلواک غړي په توگه ومني.

پولنډي وزير او اشټون

پولنډي وزير او اشټون

 د پولېنډ په څوپوټ کي د اروپايي ټولنې د غړو هيوادونو د بهرنيو چارو د وزيرانو غونډه تر سره سوه. د اروپايي هيوادونو استازو يو ځل بيا خپل هغه دريځ روښانه کړی چي د فلسطين په موضوع کي به د « چوپ پاته کېدو او انتظار کولو» پاليسۍ ته دوام ورکړي. دغه هيوادونه لا تر اوسه پدې هکله تصميم نيول نه غواړي چي په ملگرو ملتونو کي به د فلسطينيانو د خپلواکۍ غوښتنې ته څه ډول ځواب ووايي.

 د پولېنډ د بهرنيو چار وزير رادوسلاف سيرکورسکي په غونډه کي ويلي چي اروپا به هغه وخت خپل غبرگون وښيي کله چي فلسطينيان په رسمي توگه دغه غوښتنليک وړاندي کړي.

 د المان د بهرنيو چارو وزير گيدو وېستروېله بيا ويلي دي چي المان به د اسرائيل سره د خپلو ځانگړو اړيکو په نظر کي ساتلو له مخي خپله پرېکړه وکړي. دا پداسي حال کي ده چي د المان د پراختيايي مرستو وزير ديرک نيبل او د بهرنيو چارو وزير څو ځله تر مخه لا و فلسطين ته ويلي چي د يو جانبه اقداماتو څخه دي ډه ډه وکړي. المان چي د اسرائيل يو ټينگ ملاتړی هيواد دی غواړي چي اسرائيل او فلسطين د خبرو اترو له لاري و يوې گډي پايلي ته ورسيږي.

 د فلسطين د خپلواکمنې ادارې ولسمشر محمود عباس ويلي ول چي د سپتامبر په 21 مه نېټه به د ملگرو ملتونو څخه غوښتنه وکړي چي د يوه غړي هيواد په توگه فلسطين ومني.

 فرانسې ويلي دي چي که اسرائيل مخ په وړاندي هم د فلسطينيانو سره د خبرو اترو لپاره چمتو والی ونه ښيي نو ښايي د فلسطينيانو د غوښتنې په حق کي رايه ورکړي.

 آژانسونه/ احمدولي اچکزی

کتونکی: مسعود جهش

DW.COM