اروپايي ټولنې په ليبيا کي ټاکنې ستایلي دي | دويچه ويله پښتو | DW | 08.07.2012
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

دويچه ويله پښتو

اروپايي ټولنې په ليبيا کي ټاکنې ستایلي دي

په ليبيا کي د څو لسیزو وروسته د لومړي ځل له پاره تر سره کېدونکي آزادي ټاکنې بې له کومو جدي پيښو پای ته رسېدلي دي. د لومړنيو راپورونو له مخي په دغو ټاکنو کي څه باندي شپېته فيصدو د رايه اچونې حق درلودونکو خپلې رايي کارولي دي.

دغه ټاکنې د هغې دوه سوه کسيزي ملي شورا له پاره تر سره سوې دي چي د هيواد له پاره به نوی اساسي قانون جوړوي. د شورا د ۲۰۰ چوکيو له پاره څه باندي ۳۷۰۰ کسانو ځانونه کانديد کړي ول. دغه شورا به د پاڅون د ملي شورا څخه چي پخوانی ولسمشر معمر القذافي ئې راپرځولی وو، واک تر لاسه کړي.

قذافي تېر کال په ليبيا کي د تېښتي پر وخت وژل سوی وو. اټکل کيږي چي د دغو ټاکنو لومړۍ پايلې به د دوشنبې په ورځ اعلان کړل سي. د اروپايي ټولنې د بهرنيو چارو مسئولي کاترين اشتون د ليبيا د شورا ټاکنې ستايلي دي او په دغه هيواد کي ئې د نوي دموکراتيکي دورې له پېل سره تشبيح کړي دي.