1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

آيا له طالبانو سره به د خبرو نېټه وټاکل سي؟

له طالبانو سره د سولي خبرو اترو پيلېدو ته د تياري له پاره په کابل کي د څلور اړخيزي ډلي غونډه پيل سوه. د غونډي هدف له طالبانو سره د خبرو له لاري د افغانستان د اوږدې جگړې ختمول دي.

د څلورو هيوادونو افغانستان، پاکستان، چين او امریکا استازي نن سه شنبه (۲۰۱۶م کال د فيبروري ۲۳مه) په کابل کي په خپله څلورمه غونډه کي سره راټول سوي، څو د کابل او طالبانو ترمنځ د سولي خبرو اترو د پيلېدو پر څرنگوالي باندي بحث وکړي.

د افغانستان د اجرائيوي رئيس د وياند مرستيال جاويد فيصل اسوشېتد پرس خبري آژانس ته ويلي دي چي «استازي بايد د مخامخ خبرو اترو يوه نېټه وټاکي.»

د دغو څلورو هيوادونو استازي په خپله وروستۍ غونډه کي چي د فيبرورۍ مياشتي پر ۶ نېټه په اسلام آباد کي وه، پر دې باندي سره سلا سول چي دواړه اړخونه بيرته د سولي خبرو اترو و بيا پيلېدو ته وهڅوي.

د افغانستان د بهرنيو چارو وزير صلاح الدين رباندي په کابل کي د څلور اړخيزي ډلي غونډي د پرانيستلو پرمهال وويل چي د لومړۍ غونډي جزئيات به د فيبرورۍ مياشتي په وروستيو کي اعلان سي.

خو فيصل ويلي دي: «موږ د دغي غونډي د نتيجې په تمه یوو، څو موږ ته د سولي د لومړيو مخامخ خبرو اترو د پيلېدو يوه نېټه راکړي.»

په اسلام آباد کي له طالبانو سره پټ ملاقات

د پاکستان د امنیتي کړیو په حواله د دريمي غونډي ترمخه لا يوې ډلي په اسلام آباد کي د طالبانو له لوړپوړو چارواکو سره د خبرو اترو د پيلېدو پر نېټې باندي سره سلا سوي دي. د طالبانو په استازو کي د قطر د دفتر مشر هم شامل وو. خو افغان چارواکو او د سولي عالي شورا دا خبره رد کړې ده.

د دغي څلور اړخيزي ډلي په نورو غونډو کي له طالبانو سره د خبرو اترو له پاره يوه «کړنلاره» جوړه سوې ده. خو جزئيات ئې روښانه سوي نه دي.

د کار پوهانو په اند دغه خبري اتري کيدای سي مياشتي او کلونه دوام وکړي، ځکه طالبان د افغان حکومت هغه شرطونه چي اساسي قانون ته دي غاړه کښېږدي، نه مني.

د کابل حکومت په نورو غونډو کي هم غوښتنه کړې وه چي د سولي خبرو اترو د پيلېدو له پاره دي وسله وال طالبان زورزياتی کم کړي، خو دوی دوام ورکړی.