1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

افغانستان

آيا افغانستان به د سوداگرۍ نړيوال سازمان غړی سي؟

د افغانستان د سوداگرۍ او صنايع وزارت تلاښ کوي، چي تر ۲۰۱۴ کاله پوري دغه هيواد د سوداگرۍ نړيوال سازمان غړيتوب ترلاسه کړي. دغه سازمان تلاښ کوي چي د غړو هيوادونو تر منځ د سوداگرۍ اسانتياوي برابري کړي.

افغانستان له هغو هيوادونو څخه دی چي په وچه پوري تړلی دئ او د سوداگرۍ په برخه کي له گاونډيو هيوادونو په ځانگړې توگه له پاکستان سره ستونزي لري.

افغانستان په سلو کي ۹۵ واردات او ۵ سلنه صادرات لري، چي په دغه برخه کي هم په گاونډيانو پوري تړلی دئ.

د افغانستان د سوداگرۍ او صنايع وزارت تجارتي مرستيال مزمل شينواري، د شنبې په ورځ په کال کي خبريالانو ته وويل، چي که څه هم د دغه سازمان غړيتوب ترلاسه کول اسانه کار نه دئ، خو بيا هم دغه هيواد تلاښ کوي، چي تر ۲۰۱۴ کاله پوري د هغه د غړيتوب په ترلاسه کولو بريالی سي.

هغه وويل: «موږ هيله من چي د ۲۰۱۴ کال ترپايه پوري به د دغه سازمان غړيتوب ترلاسه کړو، ځکه افغانستان په وچه پوري تړلی هيواد دئ او سوداگريزو اسانتياوو ته اړتيالري.»

افغانستان اوس د سوداگرۍ نړيوال سازمان، څارونکي غړی دئ. دغه سازمان ۱۵۷ اصلي غړي او ۳۰ څارونکي غړي لري.

د سوداگرۍ د نړيوال سازمان موخي د سوداگرۍ په برخه کي د غړو هيوادونو ترمنځ اختلافات له منځه وړي او تلاښ کوي، چي د سوداگرۍ په برخه کي اسانتياوي رامنځته کړي.

د سوداگرۍ وزارت چارواکي وايي، چي په دغه سازمان کي د گډون اساسي شرطونه، په بېلابېلو برخو کي د قوانينو اصلاح او تصويب، د سوداگرۍ پلانونو د پرمخ بېولو له پاره د مسلکي کادرونو لرل او د گمرکونو مجهزول دي.

شينواري په دې اړه وويل، چي افغانستان بايد خپله سوداگري د سوداگرۍ د نړیوال سازمان له معيارونو سره برابره کړي. هغه وويل، افغانستان بايد، لکه د سوداگرۍ نړيوال قانون، د پانگوني او کرهڼي په برخه کي روښانه قوانين ولري.

سوداگريز سهولتونه

د سوداگرۍ او صنايعو وزارت وايي، په هغه صورت کي چي افغانستان د سوداگرۍ نړيوال سازمان غړيتوب ترلاسه کړي، کولای سي چي د دغه سازمان د غړي هيوادونو په قلمرو کي بې له ځنډ او خنډه ترانزيت وکړي.

په هغه اعلاميه کي چي د سوداگرۍ وزارت له خوا خپره سوې ده، راغلي دي چي افغانستان د سوداگرۍ په برخه کي ډيري کښتي پورتي له پاکستانه سره لري، نو د دغه سازمان د غړيتوب په ترلاسه کولو سره به د پاکستان دولت هغه بهانې او خنډونه چي په دغه برخه کي ئې کوي تر ډيره له منځه ولاړ سي.

حسين سيرت/ کابل
کتونکی: نجيب الله زيارمل

DW.COM