1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

آلمان او نړۍ

آلمان غواړي له کوردانو سره خپله نظامي مرسته زياته کړي

آلمان نه غواړي چي په عراق او سوريه کي پر «اسلامي دولت» اسلامپاله افراطي ترهگرې ډلې باندې په هوايي بريدونو کي برخه واخلي. خو د آلمان د دفاع وزارت له کوردانو سره د لا زياتو وسلو او پوځي روزني مرستو ته چمتو دی.

د آلمان فدرال دولت غواړي چي په عراق کي د کوردي جنګياليو پيشمرګانو سره خپلي مرستي لا زياتي کړي. دا چي آلمان په څه ډول د «اسلامي دولت» پر ضد کوردي ملېشي تقويه کولای سي، د دفاع وزارت ورباندي غور کوي. د نورو وړانديزونو تر څنګ په ايربيل کي د کوردي وسلوالو د پوځي روزنې له پاره د يوه مرکز د جوړولو پر وړانديز هم غور کيږي.

د دفاع د وزيري وياندي ويلي دي چي آلمان پر دې هم غور کوي چي په عراق کي عراقي دولتي عسکرو ته پوځي روزنه ورکول سي. د دغې وياندي په وينا دا هم ممکنه ده چي لوړ پوړي آلماني پوځي افسران د مشاورانو په توګه سيمي ته ولېږدول سي.

د آلمان د دفاع وزارت په داسي حال کي د کوردانو سره د خپلو مرستو د پراخولو خبره کوي چي امريکا متحده ايالتو ورڅخه تېره اوونۍ د لا زياتي ښکېلتيا غوښتنه کړې وه. د آلمان حکومت د څو ورځي راهيسي د عراق په شمال کي کوردي مليشو یا پيشمرګانو ته وسلې لېږدوي چي پکښي د ټانک ضد توغندي هم شامل دي.

د «ميلان» په نوم د دغو توغندیو د کارولو له پاره د پوځي روزنې تر لاسه کولو په موخه يو شمېر پيشمرګان آلمان ته هم راوستل سوي دي. دغه کوردي جنګيالي د آلمان په هوملبورګ کي تر روزنې لاندي دي.

«ژمی مرګونی دی»

له بل اړخه د آلمان د پراختيايي مرستو وزير ګېرد ميولر، پر نړیوالو ږغ کړی دی چي د سوريې او عراق له پناه غوښتونکو سره دي لا زیاته مرسته وکړي. ګېرد ميولر د عراق په شمال کي د مهاجر کمپ څخه د ليدنې پر وخت وويل: «موږ شپږو اوونۍ وخت لرو. اول بارانونه کيږي او بيا يخ راځي او ورسره بيا مرګ راځي.»

ګېرد ميولر د «زاربريوکر» په نوم آلمانۍ ورځپاڼي سره په مرکه کي ويلي دي چي آلمان به د خوراک د نړیوال پروګرام سره خپلي مرستي زياتي کړي. هغه زياته کړې چي د پناه غوښتونکو له پاره د ملګرو ملتونو د سازمان سره به هم د آلمان مرستي زیاتي سي. هغه پر اروپايي اتحاديې ږغ کړی دی چي د مهاجرو سره د مرستي له پاره په میلياردونو يورو چمتو کړي.

د پراختيايي مرستو آلمانی وزير ګېرد ميولر، د چهارشنبې او پنجشنبې په ورځو (د اکتوبر ۲ او ۳مې نېټې) د عراق شمال ته ورغلی وو. نوموړي هلته د مهاجرو بد حالت په خپلو سترګو وليد. هغه ويلي چي د عراق او سوريې د مهاجرو سره مرسته به نړیواله ټولنه په کلنو کلنو مصروفه وساتي. د هغه په وينا د امريکا د متحده ايالتونو له خوا د «اسلامي دولت» پر مورچلونو د هوايي بريدونو له کبله د پناه غوښتونکو وضعه لا خرابه سوې ده.