1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

لوبي

آلمان د اروپايي ښځینه فوټبال سياليو اتل سو

د آلمان د ښځينه فوټبال ملي لوبډله د ۲۰۱۳ کال د اروپايي سياليو اتله سوه. دا شپږمه پرلپسې اتلولي ده چي دغه لوبډله ئې ترلاسه کوي. آلمان په پای لوبه کي ناروې ته ماته ورکړه.

The german Team celebrates after Anja Mittag (hidden) scored the 1-0 during the UEFA Women«s EURO 2013 final soccer match between Germany and Norway at the Friends Arena in Solna, Sweden, 28 July 2013. Photo: Carmen Jaspersen/dpa

Frauen-EM Finale Deutschland Norwegen Jubel

د آلمان د ښځينه فوټبال ملي لوبډلي د يکشنبې په ماښام (۲۰۱۳ کال د جولای ۲۸) په سويډن کي د اروپايي سياليو په پای لوبه کي د ناروې هيواد ملي لوبډلي ته يو د صفر په مقابل کي ماته ورکړه او په شپږم پرلپسې وار د دغو سياليو اتله سوه.

آلمان د ښځينه فوټبال د اروپايي سياليو په تاريخ کي اته واري اتل سوی دی، چي په دې کي ئې څلور واري په پای لوبه کي له ناورې هيواد څخه لوبي گټلي دي.

د دواړو لوبډلي ترمنځ لوبه داسي گرمه روانه وه چي تقريباً په هره دقيقه کي د يوه گول د وهلو احساس کېدی. د لوبي په لومړيو لسو دقيقو کي آلمان د گول وهلو درې ستر چانسونه له لاسه ورکړل. د ناروې د فوټبال لوبډلي هم زيات چانسونه لرله چي يو له هغو څخه هم پينالټي وه، چي د آلمانۍ لوبډلي گولکيپري نادين انگيرير را وگرځوله.

د لوبي په لومړۍ نيمايي کي يوه لوبډله هم د گول په وهلو ونه توانېده. خو په دوهمه نيمايي کي لوبه تر لومړۍ نيمايي هم تونده پيل سوه او دواړو لوبډلو د يوه او بل پر گولونو باندي حملې پيل کړې.

د آلمان لوبډلي گولکيپري لومړۍ پينالټي را وگرځوله

د آلمان لوبډلي گولکيپري لومړۍ پينالټي را وگرځوله

د لوبي په ۴۹ دقيقه کي د آلمان لوبډلي تکړه لوبغاړي انا ميتگ، چي پنځه دقيقې دمخه ميدان ته داخله سوې وه گول ووهاه او لوبه يو د صفر پر وړاندي د آلمان لوبډلي په گټه روانه وه.

د ناروې د فوټبال لوبډلي خپلو حملو ته دوام ورکړ او داسي ښکاريده چي گول به ووهي او لوبه به مساوي کړي. د لوبي په ۷۹ دقيقه کي يو وار بيا آلمانۍ لوبډلي د خپل گول و مخ له يوې ناروېږۍ سره فول وکړ او د لوبي ريفري بيا هم د آلمان لوبډله په پينالټي جريمه کړه. خو د آلمان لوبډلي گولکيپره په دغه لوبه کي دومره تکړه وه چي دوهمه پينالټي ئې هم را وگرځوله او لوبه بيا هم يو د صفر پر وړاندي روانه وه.

دوهم وار ئې هم پينالټي را وگرځوله

دوهم وار ئې هم پينالټي را وگرځوله

په دې شان نو د لوبي ۹۰ دقيقې پوره سوې او په څلورو دقيقو اضافي وخت کي هم کوم نوي څه پېښ نه سول او لوبه د آلمان د ښځينه فوټبال لوبډلي په گټه تمامه سوه او دغه لوبډله د ۲۰۱۳ کال د ښځينه فوټبال د اروپايي سياليو اتله سوه.

د آلمان لوبډله به د دوشنبې په ورځ خپل هيواد ته راستنه سي او په فراکنفورت کي به په يو لړ رسمي مراسيمو کي د لوبډلي تود هرکلی وسي.