پنيتا او کرزي د بندو دروازو تر شا خبري کړي
۱۳۹۰ تیر ۱۹, یکشنبه
دا د امریکا د دفاع وزیر په توګه د پنیتا له ټاکل کیدو وروسته کابل ته د هغه لومړی سفر دی. نوموړي له کابل دمخه د دغه ښار شمال پلوه پراته پوځي هوایې ډګر بګرام کې له خپلو جنرالانو سره وکتل.
وروسته یې یوې خبري غونډي ته وینا وکړه او د کابل له حکومت سره یې په خپلو اوږد مهالو مرستو ټینګار وکړ.
نوموړي وویل چې د القاعدې ډله ځپل سوي او اوس یې یوازي د لسو او شلو تر منځ کلیدی مشران په پاکستان او یمن کې پاتي دي چې د هغو په له مینځه وړلو سره به دغه شبکه فلجه سي.
د امریکې دفاع وزیر تیره ورځ ناوخته له بګرامه کابل ته راغی او هوایې ډګر ته غزیدلی واټ هم د تګ را تګ پر مخ تړلی وو.
افغانستان ته د پنیتا سفر پر داسي مهال تر سره سو چې تیره ورځ په شمالي پنجشنیر ولایت کې یوه افغان ساتونکې د ناټو دوه امریکایې عسکر په ډزو ووژل .
د ولسمشر کرزي له ماڼۍ څخه یو خپور سوی بیان چې یوه کاپې یې همدا نن سهار دویچې ویلي ته را استول سوي کاږي چې د امریکې دفاع وزیر له ولسمشر کرزي سره په ارګ کې د بندو دروازو تر شا خبري کړي دي.
په وینا پاڼه کې راغلي چې دواړو لورو د افغان ځواکونو په تجهیز، د امنیت د لیږد په برنامې او همدا راز د کابل او واشنګټن ترمنځ په ستراتیژیکو اړیکو مفصلي خبري کړي دي.
د افغانستان او امریکې تر منځ له څو میاشتو راهیسې د ستراتیژیک قرارداد پر سر خبري رواني دي خو تر اوسه دغه تړون ندی نهایی سوی .
افغان دولت وایې چې د امریکا دفاع وزیر به دکابل د حالات څخه تر جاج اخیستنی وروسته په قوي احتمال کندهار ته سفر وکړي چېرته چې تیره ورځ ترینه کاناډايي ځواکونه په بشپړه توګه ووتل.
دمګړۍ د کندهار امنیت د ناټو امریکايي سرتیرو ته سپارل سوی دی.
په کابل کې د امریکې سفارت هم ویلي چې نن ورځ به د امریکا دفاع وزیر له خپل افغان سیال، د افغان پوځ له لوی درستیز جنرال شیرمحمد کریمي او په قوي احتمال په افغانستان کې د ناټو ځواکونو له عمومي قوماندان جنرار دیوید پترویس سره وګوري.
د جنرال پترویس د ماموریت موده هم په راتلونکو څو ورځو کې پای ته رسیدونکي ده.
کابل ته د امریکې د دفاع وزیر سفر پر داسي مهال صورت مومي چې له افغانستان څخه د امریکایې سرتیرو د وتلو برنامه پیل سوي ده.
امریکایی مشران غواړي افغانستان ته په خپلو دغو سفرونو سره د کابل له حکومت سره خپله نږدې همکاري او له هغه څخه ملاتړ څرګند کړي.
خو برعکس د زور پالو بغاوتونه زور اخلي.
په تیره یوه میاشت کې طالبان د افغانستان په څو ولایتونو کې پر حکومتي تاسیساتو بریدونه وکړل چې وروستی هغه یې د نورستان په کامدیش او دوه ابه ولسوالۍ د هغوي ډلیز بریدونه دي چې په ترځ کې یې په لسګونو افغان پولیس سرتیري وژل سوي دي.
ميرويس جلالزی/ کابل
کتونکی: احمدولي اڅکزی