پاکستان: په يوه زيارت باندې بريد ۲۰ انسانان وژلي
۱۳۹۶ فروردین ۱۳, یکشنبه
د بريد درې واړه عاملين ونيول شول. هغه د پوليسو د څرګندونو له مخې په دې هم تورن دي چې قربانيان يې تر بريد مخکې مسموم کړي او بيا وژلي ول.
د بريد انګيزه تر آخره پورې معلومه نه وه. د سرګودها ښار ته څېرمه پراته د زيارت ساتونکي، د پوليسو د څرګندونو له مخې ويلي دي چې زايرين يې وژلي دي ځکه چې د هغوی له خوا يې ځان تر ګواښ لاندې راغلی بللی وو.
د پوليسو سيمه يز مشر، ذلفقار حميد، وويل چې دغه ۵۰ کلن ساتونکی ښايي رواني مشکلات ولري، خو له بلې خوا داسې هم کېدای شي چې دغه بريد دې د زيارت د کنترول په سر د رقابتونو پايله وي. پلټونکي په دې اند دي چې ساتونکي قربانيانو ته لومړی زهر ورکړي ول. دغه خبره د پوليسو مشر، شمشير جويا، کوي.
خو د دغې انګېرنې د تثبيت له پاره بايد انتظار وايستل شي څو جنايي پلټنې پای ته رسېدلې وي. د وژل شوو کسانو جامې د دغو څرګندونو له مخې څيري کړل شوې او په وينو لړلې وې. د قربانيانو په ډله کې د پوليسو په حواله څلورو ښځو هم شتون درلود.
د ژغورونکو ډلو د يوه چارواکي په خبره د زيارت ساتونکي پخوا هم د خلکو په وړاندې له تاوتريخوالي څخه کار اخيستی وو. د سيمې اوسېدونکو وويل چې نوموړي پخوا هم زايرين وهلي ول، څو هغوی په اصطلاح «له بېلابېلو جسمي او روحي ناروغيو څخه وژغوري.»
پر ورته موضوع یو انځوريز البوم زموږ له آرشيف څخه (07.03.2017):