1. محتوا ته تګ
  2. اصلي مینو ته تګ
  3. د دویچه ویله نورو پاڼو ته تګ

سويس ته له هوايي لاري د ناقانونه مهاجرو تگ سختيږي

آژانسونه / ا.و.ا.۱۳۹۵ شهریور ۲, سه‌شنبه

سويس د بعضو آسيايي هيوادونو څخه په هوايي لاره د راتلونکو مسافرو کنټرول سخت کړی دی. دغه هيواد غواړي په دې توګه د هوايي لاري د راتلونکو ناقانونه کډوالو مخه ونيسي.

https://p.dw.com/p/1JnoO
Schweiz Flughafen Zürich
انځور: picture alliance/KEYSTONE/M. Ruetschi

سويس هيواد د ناقانونه کډوالو د مخنيوي له پاره د بعضو آسيايي هيوادونو څخه په هوايي لاره د راتلونکو مسافرو کنټرول زيات کړی دی. په دې ترڅ کي ويل سوي چي د نورو تر څنګ د هند د نوي ډلي، هانګکانګ، سنګاپور او د عمان له مسقط څخه راتلونکي مسافر به زيات کنټروليږي.

د هوايي مسافرو د کنټرول د سختولو دغه معلومات د سه شنبې په ورځ (د ۲۰۱۶ کال د اګست ۲۳مه نېټه) د مهاجرت له پاره د سويس د ځانګړي ادارې دفتر ورکړل. يادي ادارې ويلي چي په دې خاطر له يادو هيوادونو څخه د راتلونکو مسافرو کنټرول زيات کړل سوی دی، ولي چي سويس غواړي په دې توګه له يادو ځايونو څخه د ناقانونه راتلونکو مهاجرو مخنيوی وکړي.

په دې ترڅ کي هغه هوايي شرکتونه چي د آسيا له يادو ښارونو څخه و سويس ته پروازونه کوي، بايد په سويس کي د الوتکي د ناستي څخه تر مخه لا د سويس چارواکو ته د خپلو مسافرو په تړاو بشپړه معلومات ورکړي، لکه دا چي هغوی څوک دي او څه ډول د سفر کاغذونه لري.

د سويس چارواکي به د دغو معلوماتو د ترلاسه کولو سره سم دغه اسناد کنټرولوي او ارزيابي کوي به يې. سويس په پام کي لري چي د مسافرو دغه راټول سوي معلومات به د ۲۴ ساعتونو وروسته بېرته له منځه وړل کيږي. په دې توګه سره به نو سويس تر ۲۰ څخه د زياتو نړيوالو ځايونو څخه راتلونکو مسافرو کنټرول سخت کړي.

د دې څخه تر مخه د اېټاليې او سويس پر پوله د بندښت رامنځ ته کېدو له کبله زيات شمېر مهاجر بند راغلي ول چي د بشر د حقونو سازمانونو د سويس پر دغه اقدام نيوکي کړي وې.

په زياته بيا د ايريتريا، ايتوپيا او نورو افريقايي هيوادونو سره تړاو درلودونکو مهاجرو له پاره د سويس پر پوله اوښتل د جولای مياشتي راهيسي زښت سخت سوي دي. په دې ترڅ کي د آلمان او سويس تر منځ هم پر پوله کنټرول زيات کړل سوی دی.

پر ورته موضوع یو انځوريز البوم زموږ له آرشيف څخه: