د نوي پارلمان د کار د پيلېدو پر سر اختلافونه
۱۳۸۹ آذر ۹, سهشنبه
د افغانستان د لوی څارنوالۍ مرستيال رحمت الله نظري وايي چي په درغلیو د تورنو کانديدان د دوسيو تر ختميدو پوري به د نوي پارلمان کار پيل نسي.
خو د ټاکنو خپلواک کميسيون د دوشنبې د ورځ راهيسي برياليو کانديدانو ته د اعتبار ليکونو په ورکولو سر پيل کړی او ويلي يې دي چي هر هغه چا چي اعتبار لیک تر لاسه کړی هغوی د نوي پارلمان غړي دي.
د ټاکنو کمېسيون د وياند مرستيال، تابش فروغ، په خبره د ټاکنو د ورستيو پايلو اعلامول او کاميابو کانديدانو ته د تصديق ليکونو ورکول د ټاکنو د مستقل کمېسيون دنده ده.
هغه دغه راز زياته کړې چي تر اوسه ډير شمير کانديدانو خپل تصديق ليکونه ترلاسه کړي دي او دوی دې ته په تمه دي ترڅو د افغانستان د نورو برخو څخه هم بريالي وکيلان کابل ته راسي او خپل تصديق ليکونه ترلاسه کړي.
د بلې خوا د ولسمشر کرزي وياند، وحيد عمر، ويلي دي چي د نوي پارلمان د کار پيل د ټاکنو په کمېسيون پوري اړه لري.
عمر ويلي چي ولسمشر کرزی به هر هغه وخت چي پارلمان کار ته چمتو سي پرانيزي.
دا په داسي حال کي ده چي د افغانستان لوی څارنوالي د 400 وکيلانو د دوسيو د څېړولو په حال کي ده.د دغو نوماندانو په منځ کي هغه وکيلان چي پارلمان ته کاميابه سوي هم ګدون لري.
د افغانستان د لوي څارنوالۍ چارواکو ويلي دي چي د دغو دسيو کار به د راتلونکي اونۍ تر پايه تمام او ستري محکمې ته به و لېږل سي.
د غزني ولايت د ورستيو پايلو برخليک لاتر اوسه معلوم ندی. که څه هم د حامد کرزي وياند، وحيد عمر، وايي چي ښاغلی کرزی د ټاکنو د کمېسيون پر کار څه اغيزه نه لري، خو د غزني د ولايت کامياب وکيلان وايي چي د دغه ولايت د ورستيو پايلو د نه اعلانيدو اصلي لامل افغان ولسمشر حامد کرزی دی.
تردې د مخه، حامد کرزي د غزني د ټاکنو په اړه اندېښنه ښودلي وه.
ځيني کارپوهان په دې اند دي چي حامد کرزي د غزني ځينو کاميابو کانديدانو ته د مهمو دولتي پوستونو پيشهناد کړی، او غوا ړي د دغو کانديدان په عوض د غزني د ناآرامه سيمو څخه ناکام سوي کانديدان د افغانستان پارلمان ته راولي.
حسين سيرت/ کابل
کتونکی: نجيب الله زيارمل