د اوباما د ټاکنې پر وړاندې د آلمان غبرګون
۱۳۹۱ آبان ۱۷, چهارشنبه
مخکې له دې چې میت رامني په ټاکنو کې پر خپلې ماتې اعتراف وکړي، د آلمان د بهرنیو چارو وزیر ګیدو ویسترویله، د آلمان د حکومت د لومړي غړي په توګه په یوه آلماني تلویزیون کې د متحده ایالاتو د ټاکنو د پایلو په هکله څرګندونې وکړې.
ویسترویله هغه وخت په نیویارک کې وو او ویویل: «د متحده ایالاتو د ټاکنو د ګټونکي بارک اوباما، د ریاست په لومړۍ دوره کې موږ په بهرني سیاست کې ډیره ښه همکاري لرله. په دې لاره کې موږ د سر ته رسولو له پاره ډیر نور څه لرو.»
وستر ویله وویل چې په روسیه کې تر نوو ټاکنو وروسته او په امریکا متحده ایالاتو کې د «ناباوري دورې» له پای ته رسیدو سره باید اوس دغه دواړه هیوادونه د وسلو د کمولو له پاره نوې لارې اوارې کړي.
د آلمان صدراعظمې انګلا میرکل د متحده ایالاتو د ولسمشر په توګه د بارک اوباما د بیا ټاکنی په مناسبت د خپلې مبارکي په پیغام کې د دواړو هیوادونو پر ښو اړیکو ټینګار وکړ.
میرکل یادونه وکړه چې په تیرو کلونو کې هم د امریکا او المان تر منځ په ډیرو برخو کې له نزدې همکارۍ شوې دي. په عین وخت کې میرکل اوباما ته بلنه ورکړه چې د خپل ریاست په نوې دوره کې آلمان ته سفر وکړي. اوباما د خپلې ولسمشرۍ په لومړۍ دوره کې هیڅکله نه دی توانیدلی چې د آلمان له پلازمینې برلین څخه لیدنه کتنه وکړي.
د آلمان د سوسیال دیموکرات ګوند پارلماني مشر فرانک والتر شتاین مایر، چې پخوا د آلمان د بهرنیو چارو وزیر وو د متحده ایالاتو د ولسمشر په توګه د اوباما د بیا ټاکل کیدو هرکلی کړی دی.
هغه ویلي دي: «اوباما دا توان لري چې د امریکا مختلفې ګټې، پرګنې او بیلابیل قومونه سره په یوه هیواد کې متحد کړي. زه فکر کوم چې له همدې کبله پر تردیدونو سربیره ډیرو خلکو هغه یو ځل بیا د امریکا د ولسمشر په توګه وټاکه.»
په همدې حال کې د آلمان ولسمشر یوآخیم ګاوک، هم په خپل وار سره د امریکا متحده ایالانو د ولسمشر په توګه د اوباما د بیا ټاکل کیدو هرکلی کړی دی او هغه ته یې مبارکي ویلي ده.