انځورونه: د بېگناه ماشومانو د ژوند دردونکی حالت
سږ کال د ماشومانو تر نړیوالي ورځې مخکې، شاید هم کله په دومره لوړ شمیر کې ماشومانو د جگړې او غربت له ویرې د تیښتې کوښښ کړی وي.
نا مطمئنه راتلونکې
په عراق او سوريه کې افراطي ډلي «اسلامي دولت» له ظلم څخه د ځان ساتلو په خاطر په زرونو ایزیدي ماشومان هم بې کوره شوې دي. هیڅ څوک هم نه پوهیږي چې دغه ماشومان به کله وکولای شي بیرته خپلو کورونو ته ستانه شي. د عراق او ترکیې په یو سرحدي کمپ کې د یو ایزیدي ماشوم په سترگو کې بې اطمیناني احساسیږي.
د لوبې پر ځای کار روزگار
آلمان ته په ناڅاپي توگه د کډوالو هجوم. د آلمان د بايرن ایالت د کډوالو په یو کمپ کې یو ماشوم د خپل بستري غوړولو په حالت کې لیدل کیږي. په عراق او سوريه کې روان وضعیت له ماشومانو څخه د دوی ماشومتوب هم اخیستې وو.
د یوې ښې راتلونکي په هیله
که څه هم دغه ماشومان د یونان او مقدونیا په سرحدي سیمه کې بند پاته دي، خو بیا هم دغه ماشومه قوي اراده لري. دوی له دغه ځای څخه د هنگري پر لور خپل سفر جاري ساتي.
د ستړتیا له امله بې خودي
په یو شمیر هغو ریل گاډو کې چې له بوداپسته د آلمان د مونشن ښار پر لور روان ول، کډوالو چې لږ ځای هم پيدا کاوه خپل ماشومان به یې پکښې ویده کول. د بالکان له لاري لویدیځي اروپا ته د رسیدو په هڅه کې دوی ډیر ستړي شوې دي.
له جگړې څخه د تیښتې کوښښ
په عربي هیوادونو کې تر ټولو بې وزله هیواد یمن اوس مهال له شدید بحران سره مخامخ دی. په زرونو یمنیان له خپلو ماشومانو او مالونو سره د جگړې له ویرې په تېښته کې دي. د دغې شخړې په ترڅ کې په زرونه کسان وژل شوې دي چې ډیر يې ماشومان هم دي.
د خوړو له پاره په کتارونو کې دریدل
بې له نړیوالو مرستو د سوریې ډیر خلک خپل ژوند نه شي پر مخ بیولای. دغه ماشومان په بې صبرۍ سره انتظار باسي چې د خوراک له پاره یو څه ترلاسه کړي. د ادلیب په کمپ کې د سوریې د ماشومانو له پاره ځانگړي ترتیبات نیول شوې دي.
له جگړې څخه خلاصون
له شخړو او جگړو څخه تښتیدلي ماشومان او لویان چې اروپا ته رسیدلي دي، له نوي چاپيریال سره بلدیدل ورته یو څه ستونزمن ښکاري. دوی باید ځان پوه کړي چې ټکټ څنگه اخیستل کیږي او څنگه باید سفر وکړي. په دې انځور کې توماس ویبل یو شمیر ماشومانو ته د ټکټ ماشین کارول ښئ.
باید پر مخ ولاړ شو
د کډوالو له پاره د نړیوالي ادارې په حواله سږ کال له افریقا څخه د مدیترانې له لاري ایټالیا ته د رسیدونکو کډوالو شمیر ۱۲۱زرو ته رسیږي. د دغې لارې په مسیر کې ۲۶۰۰ انسانانو خپل ژوند هم له لاسه ورکړی دی. ایټالیا ته رسیدلي کډوال غواړي خپل سفر د شمالي اروپایې هیوادونو پر لور جاري وساتي. له همدې امله د ماشومانو له پاره د لمپيدوزا ټاپو یوازې یو موقتي ځای دی.
د ماشومانو د پام بدلولو کوښښ
د ښوونځي مصروفیتونه کولای شي د ماشومانو د پام بدلولو په برخه کې اغیزمن ثابت شي. دا په میانمار کې د کډوالو یو کمپ دی، چې د بې کوره شوو روهنگیایې مسلمانانو د ماشومانو له پاره یو ښوونځې هم جوړ شوې دی. په دې ځای کې د ماشومانو له ذهنونو څخه د جگړې د اثراتو د لیرې کولو کوښښ کیږي.
د پوځي مقاصدو له پاره د ماشومانو استعمالول
د افریقا لوې وچې په ډیرو شخړو کې ماشومانو ته هم د جگړې په موخه روزنه ورکول کیږي. هلته ډیره ستونزمنه ده چې کم عمره ځوانان دې د وسله والو جگړه مارو ډلو له منگولو وژغورل شي. د مرکزي افریقا جمهوریت په شخړو کې له ماشومانو څخه هم کار اخیستل کیږي.
د بوکو حرام ناخوالې
د بوکو حرام ترهگري ډلي په ځانگړي توگه شمالي نایجیریا او گاونډیو هیوادونو کې یو وحشت خپور کړی دی. د ملگرو ملتونو د یونیسف ادارې په حواله د دغې ترهگري ډلي له امله ۱۴ سوه زره ماشومان بې کوره شوې دي.د نایجیریا په یو کمپ کې ماشومان د خپلې لوږې د ختمولو کوښښ کوي.