امریکا او اردن د سوریې په اړه گډ دریځ لري
۱۳۹۲ فروردین ۳, شنبه
د اوباما او د اردن پاچا عبدالله دویم، تر منځ د لیدنې پر مهال د خبرو اترو تر ټولو مهمه موضوع د سوریې شخړه وه. اردن له دې هیواد سره اوږده ګډه پوله لري. په سوریې کې د وروستیو دوو کلونو جگړې د اردن اقتصاد ته هم سخت تاوان رسولی دی.
د اردن پاچا وویل اوس له سوریې څخه د هغه هیواد ته ډیر شمیر گډوال رسیدلي دي چې شمیر یې د اردن د ټول نفوس لس لسنه ته رسیږي. خو پر دې سربیره هم هغه ټینگار وکړ چې هیواد به یې د سوریایي کډوالو پر مخ خپله پوله و نه تړي. هغه زیاته کړه: «دا یوه داسې ننگونه ده چې موږ ورته شا نه شو اړولی.»
اوباما وویل چې د خپل هیواد له کانگرس څخه به وغواړي چې په اردن کې له کډوالو سره د مرسته کولو له پاره ۲۰۰ میلیونه ډالر اضافي مرستې په پام کې ونیسي. اوباما وویل چې دغه پېسې به د بشري مرستو او لومړنیو خدمتونو د وړاندې کولو په برخه کې ولگول شي. اوس مهال په دې هیواد کې شاوخوا ۴۶۰۰۰۰ سوریایي کډوال ژوند کوي.
ولسمشر اوباما همداراز اندیښنه څرگنده کړه چې سوریه د تاوتریخوالي په یوه مرکز د بدلیدو په حال کې ده. هغه وویل: «زه له دې کبله ډیر اندیښمن یم چې سوریه د تاوتریخوالي په یوه مرکز د بدلیدو په حال کې ده ځکه افراطیان په گډوډۍ، بې حکومتۍ او د قدرت په خلا کې پرمختگ کوي او قوي کیږي.»
اوباما تر دې مخکې اسرائیلو ته هم سفر کړی وو. هغه په دې سفر کې د اسرائیلو له ولسمشر بنیمین نتنیاهو، سره ولیدل. اوباما همداراز یو شمیر ځوانو اسرائیلیانو ته وینا وکړه او له هغوی څخه وغوښتل چې په خپل هیواد کې سوله راولي.