„Убиецот“ веројатно се крие во зеленчукот

Германската министерка за заштита на потрошувачите Илзе Ајгнер денеска изјави дека останува предупредуавњето да се избегнува консумирање на свежи краставици, домати и салата.

„Се‘ додека експертите во Германија и во Шпанија не успеат недвосмислено да го лоцираат изворот на заразата, останува на сила предупредувањето“, изјави Ајгнер за „Билд ам зонтаг“.

Стручњаците на ЕУ оценуваат дека актуелната состојба со заразата со стомачната бактерија во Германија е една од најтешките во светот. Очигледно дека бранот на ширењето на инфекцијата ја нема достигнато кулминацијата. Според портпарол на Министерството за социјала во покраината Долна Сакосонија се очекува дополнително зголемување на бројот на заболените, со оглед на тоа што од консумирањето заразена храна до избивањето на болеста можат да поминат до десет дена.

Лекарите сега во борбата против смртоносната бактерија полагаат надежи во нов лек, кој треба да спречи откажување на работата на бубрезите.

Од починатите десет лица девет се жени, а сите се од северна Германија. Низ целата земја меѓутоа има хоспитализирани лица кои се наоѓаат во животна опасност.

Се тврди дека засега нема непосредна опасност од заразата за другите европски држави.

Германските земјоделци пак се жалат на драстично опаѓање на потрошувачката на нивните производи. Заменикот-шеф на Земјоделското здружение на покраината Шлезвиг Холштајн, Ханс Петер Вит, обвинува за огромни штети, од кои е доведена во прашање дури и егзистенцијата на многумина земјоделски производители.

Автор: ЖА/АТ/дпа

Редактор: Александра Трајковска