Страв од нови земјотреси во Италија
1 ноември 2016
Историското старо градско јадро на Норчиа е во урнатини. Малото место наликува на град на духови. Дозвола за престој имаат само спасувачите. Нивната задача е да расчистуваат и да ги зацврстуваат историските објекти онолку колку што е можно. Зашто, опасноста не е помината. Пожарникарот Доменико де Вита објаснува:
„Се наоѓаме во центарот на земјотресното подрачје и потресите се многу силни. Толку силна сеизмичка активност не сме имале со години. Тоа многу ја отежнува заштитата на нашето културно наследство.“
Пукнатините во Апенините покажуваат со колкава сила земјата се тресеше во неделата. Тоа беше најтешкиот земјотрес во Италија во последните 30 и повеќе години.
Илјадници луѓе во регионот се без покрив над главата. Повеќе од 15 илјади спијат привремено во шатори, хотели и сместувалишта во случај на нужда. Многумина не сакаат, а и не смеат, да се вратат во домовите. Рокардо Салвиани, жител на Норчиа, со растреперен глас вели:
„Спиев на отворено. Навистина се плашиме од земјотресите во регионов. Многу сме тажни и едноставно не знаеме што треба да направиме. Немам зборови за да го опишам тоа.“
Сите во Норчиа се надеваат дека најлошото поминало. Но, сеизмолозите предупредуваат дека со недели може да има натамошни потреси.