Со приватни доверители во спас на Грција!

„Колку побрзо се реши проблемот, толку побро. Значи сега ни треба нова програма за Грција!“, јасно порача канцеларката Ангела Меркел за темата која деновиве повторно го врти светот – заканувачкиот банкрот на Грција и спасот на еврото.Три часа за новиот пакет мерки за помош кој ќе се најде на дневниот ред и на престојниот министерски Совет, Меркел разговараше со францускиот претседател Никола Саркози.И како настапија и двајцата на пресконференцијата: компромисот е постигнат! Договорени се насоките. Модалитетите на програмата допрва ќе се дефинираат, но како кажа Саркози, голем пробив е утврдувањето на четирите принципи.

„ Првиот е доброволното учество, што е од големо значење.Потоа е обврската за враќање на кредитите, што значи нема да има ненаплатени долгови. Трет принцип е брзината на донесувањето на програмата и конечно согласноста со Европската централна Банка“, објасни францускиот претседател Саркози.

Поддршка за Папандреу

„ Посакуваме учество на приватните доверители на доброволна база. Подвлекувам - на доброволна база, што значи дека нема правна основа за нивно задолжително учество и тоа ќе треба да се дефинира заеднички со Европската централна банка. Нема противречности и мораме брзо да дејствуваме за да има јаснотија во целата работа. Дискутиравме цел мај, сега и јуни, без да се дојде до решение“, забележа канцеларката Меркел.

Инаку, вклучувањето на приватните доверители во програмата за помош Меркел го окарактеризира нарече „разумно“ решение, подвлекувајќи дека мошне значајно е и Грција да си ги исполни обврските за штедење што е всушност и предуслов за ангажманот на ММФ, Европската централна банка и Европската комисија. Таа објасни дека по сите турбуленции што деновиве се случуваат во Атина, Германија и Франција и натаму стојат зад премиерот Папандреу, кој очекува сигнал од престојниот министерски совет од кој практично ќе зависи - дали втората програма за штедење ќе мине во грчкиот парламент.

Автор: Силвера Падори-Кленке

Редактор: Симе Недевски