САД: Напад врз изборен штаб на Републиканците

Во нападот врз локалниот изборен штаб на Републиканците во Хилсборо во Северна Каролина нема повредени, но е причинета материјална штета, соопшти градската управа. Ноќеска во просториите на изборниот штаб бил фрлен запаллив материјал низ прозорецот, кој предизвикал пожар.

Освен тоа, врз соседната зграда бил со спреј испишан кукаст крст и зборовите „Нави-Републиканци, напуштете го градот, инаку“. Локалното партиско раководство го оцени актот како „политички тероризам“, истакнувајќи дека постоела опасност некој да биде убиен. Бирото е целосно уништено. Републиканскиот претседателски кандидат Доналд Трамп вината им ја припиша на приврзениците на својата ривалка од Демократската партија, Хилари Клинтон. Таа пак го осуди нападот како чудовишен и неприфатлив, искажувајќи олеснување што никој не е повреден.

Трамп обвинува за изборни манипулации

Во анкетите на јавното мислење Трамп се наоѓа зад свoјата конкурентка Клинтон. Според анкета по налог на ТВ Ен-Би-Си и „Вол Стрит Журнал“, Клинтон има 48 проценти, а Трамп 37 насто поддршка. Анкета порачана од Еј-Би-Си и „Вашингтон Пост“ пак зборува за четири проценти предност на Клинтон во однос на Трамп.

Во повеќе американски сојузни држави веќе може да се гласа преку писмо или во порано отворени гласачки места.

Трамп ја доведува регуларноста на претседателските избори генерално во прашање. На Твитер тој напиша дека постои манипулација на резултатот во бројни избирачки места, а одговорноста ја лоцира кај „’фалсификувачките’ медиуми, кои ја поддржуваат корумпираната Хилари Клинтон“.