Русите и Кинезите го блокираат примирјето за Алепо
6 декември 2016
Русија и Кина со своето вето го спречија донесувањето на резолуцијата која предвидуваше седумдневен прекин на огнот. Во тој период, како што се предлагаше, луѓето во источниот дел на Алепо, кој е под опсада на трупите на Асад, би требало да добијат хуманитарна помош.
„Катастрофа за сирискиот народ“, изјави претставникот на Нов Зеланд во Советот за безбедност по седницата во Њујорк.
Рускиот амбасадор во ОН, Виталиј Чуркин, пак објаснуваше дека прекинот на огнот би бил искористен од страна на бунтовниците за ново прегрупирање и за зајакнување на нивните позиции. Тоа само би го зголемило страдањето на луѓето во Алепо, тврдеше Чуркин, образлагајќи го ставот на Русија.
Предлог резолуцијата беше поднесена од страна на Шпанија, Нов Зеланд и Египет, а поддршка дадоа и вето-силите САД, Франција и Велика Британија.
Русија и Кина уште од почетокот на сирискиот конфликт блокираат резолуции на Советот за безбедност за невоено решение на судирот. Трупите на властодржецот Башар ал-Асад, кои имаат поддршка од воздух од руските сили, од ноември досега освоија големи делови на бунтовничкото упориште Алепо.