„Разбудената“ Етна
2 март 2017По речиси едногодишен сон, вулканот Етна на почетокот од неделава повторно започна да исфрла лава и чад. Спектакуларно светлосно шоу го осветлува небото над италијанскиот остров Сицилија веќе неколку дена.
Големи фонтани од лава кои вулканот ги исфрла високо во небото можат да се видат од градот Катанија и од одморалиштето Таромина.
Иако облаците од вулкански чад можат да предизвикаат пореметувања во авионскиот сообраќај, блискиот аеродром кај Катанија функционира нормално. Италијанските власти внимателно ја следат ситуацијата и Националниот институт за геофизика и вулканологија соопшти дека ерупциите во моментов не претставуваат опасност за луѓето или за имотот во околината на вулканот.
Етна е највисокиот вулкан во Европа на надморска височина од 3.300 метри и е еден од најактивните вулкани во светот.