Против хомофобија, за различност

Иницијативата за Меѓународен ден за борба против хомофобијата, трансфобијата и бифобијата дојде од Луј-Жорж Тин, денес раководител на француската секција на Меѓународната асоцијација на ЛГБТ-лица. За таа цел е избран 17 мај, денот кога во 1990 година Светската здравствена организација ја избриша хомосексуалноста од листата на психички болести.

Меѓународниот ден почна да се одбележува од 2004 година. Денес 130 земји го одбележуваат денот за борба против хомофобија, трансфобија и бифобија, а тој е официјално признат и од повеќе меѓународни институции, како Европскиот парламент.

Канадскиот премиер Џастин Трудо најави законски мерки за заштита на ЛГБТ-лицата. Во говор што го одржа на покана на една група која се бори за права на хомосексуалците во Монтреал, Трудо вчера оцени дека и покрај досега постигнатиот напредок, сѐ уште има случаи на неправда кон овие лица. Затоа борбата за „вистинска рамноправност“ не смее да престане.

Предлог законот за заштита би требало да биде преставен денеска од страна на канадската министерка за правда, Џоди Вилсон-Рејболд. Со законот трансродноста ќе биде под заштита исто како што со канадскиот закон за заштита на човековите права веќе се под заштита расната припадност, верата, возраста, полот или сексуалната ориентација.