Попоски: Засилена дипломатија во пресрет на Самитот на ЕУ

Македонија продолжува со активностите во комуникацијата со земјите-членки на ЕУ во пресрет на декемврискиот совет на Унијата, кога ќе се одлучува по препораките од страна на Европската комисија (ЕК), вели министерот за надворешни работи Никола Попоски.

Сепак, без консензус на Советот, позитивната препорака за почеток на преговорите со ЕУ, повторно ќе ја одмине земјава, а за Македонија започнувањето на преговори со Унијата е неопходно, смета тој.

„Имаме редовни силни активности од аспект на комуникацијата која ја одржуваме со европските институции и со земјите членки. Тоа на што сме посветени е најмногу енергија да посветиме на декемврискиот самит, на клучната причина за блокада на нашата земја веќе петта година, а тоа е недостатокот од поддршка од нашиот јужен сосед за да се постигне консензус во Советот. Без такво постигнување консензус не е возможна одлука за почеток на преговорите со ЕУ, нешто што е веќе петта година препорачано од страна на ЕК. Нашите активности ќе бидат силни и ќе бидат интензивни и во периодот до декемврискиот совет, но и потоа, бидејќи објективно за Република Македонија е неопходно да ги почне преговорите со ЕУ, а тоа впрочем го констатира и самата ЕУ“, рече Попоски по работната средба со претседателите на стопанските комори во Република Македонија.

На новинарско прашање, шефот на дипломатијата изјави дека очекува на денешното гласање на Генералното собрание на ОН, Република Македонија да ја добие поддршката од членките за влез во Советот за човекови права на Светската организација.

„Наша главна цел е со учеството во ова тело на ОН, кое би било прво од таков вид за РМ, да придонесеме за глобална промоција на човековите права и сметаме дека со она што го овозможуваме како Република Македонија и со принципите на меѓународно право кои ги промовираме, ќе бидеме навистина еден добар и забележителелен член во телото за човековите права на ОН“, потенцира Попоски.