Подвиг на Франција, шоу на Роналдо

По одигрувањето на реванш баражите синоќа репрезентациите на Хрватска, Франција, Португалија и на Грција изборија пласман на Светското првенство што следната година ќе се одржи во Бразил.

Франција направи најголем подвиг откако негативата (0:2) од Украина ја анулираше со 3:0 на „Сент Дени“ во Париз. Головите за „триколорите“ ги постигнаа: Мамаду Сако, Карим Бензема и Олег Гусев (автогол).

Возбудливо со пресврти беше на дуелот Шведска - Португалија, кој гостите го добија со 3:2 и со вкупни 4:2 се пласираа на Мундијалот. Португалија поведе со 1:0, потоа Шведска за четири минути имаше водство од 2:1, а Португалија за две минути го врати водството и победата. Златан Ибрахимовиќ за Шведска постигна два гола, а Кристијано Роналдо за Португалија хет – трик.

Хрватска го победи Исланд со 2:0 во Загреб што беше и вкупен резултат, а головите ги постигнаа Марио Манџукиќ и Дарио Срна.

Единствено без победник заврши дуелот во Букурешт, Романија - Грција 1:1, но поради победата на домашен терен Грција се пласира на СП. Гостите поведоа преку Константинос Митроглу, а изедначи со автогол Василеос Торосидис.

Во африканската зона учеството на Мундијалот вчера го обезбедија Алжир и Гана. Мексико со уште една победа ги заверија убедливите победи од првите дуели против Нов Зеланд и Јордан, со што си обезбедија пат во Бразил.