Најмалку 9 жртви во судар на возови во Баварија

Баварската полиција соопшти дека во директниот судар на два патнички воза кај Бад Ајблинг, во баварскиот округ Розенхајм, девет лица го загубиле животот, меѓу нив се претпоставува дека се и двајцата машиновозачи. Десет лица се тешко повредени, осум доживеале средно тешки повреди, а 63-ца патници се полесно повредени. Засега како исчезнато се води најмалку едно лице.

Несреќата се случи изутрината на едноколосечна пруга помеѓу Холцкирхен и Розенхајм. По фронталниот судар еден од возовите излета од шините, повеќе вагони се превртија. Обата воза и’ припаѓаат на приватната железничка компанија „Меридијан“. Делницата на пругата меѓу Холцкирхен и Розенхајм, долга 37 километри, е целосно блокирана и неизвесно е до кога ќе трае тоа. Веднаш е организиран сообраќај со автобуси. Причините за катастрофата засега се’ уште се непознати. На таа делница досега, според покраинскиот министер за внатрешни работи Јоахим Херман, немало некакви пречки или технички проблеми.

Спасувачките работи беа многу отежнати поради тешко пристапното место на кое се случи трагедијата: на една стрмно, шумско место, поикрај една рекичка. Сепак многубројни спасители помгона во извлекувањето на повредените, кои со повеќе хеликоптери и возила за итна помош беа транспортирани в болница.

Возовите изутрина се полни со луѓе кои одат на работа - многумина кон Минхен. За среќа, денеска во возовите немаше ученици, оти во Баварија мометно е школски распуст.

Германскиот канцелар Ангела Меркел им изрази сочувство на семејствата на настраданите.

Ова е најтешка железничка несреќа во Германија за последните пет години. Во јануари 2011 година во судар на локален патнички и товарен воз во покраината Саксонија Анхалт загинаа десет лица. Во Баварија ваква несреќа немало од 1975 година. Тогаш се судрија два брзи воза, при што имаше 41 загинат.