Нарушување на односите Кина - Германија поради маици?

Кинеската амбасада во Берлин побара денеска германска интернет продавница да запре со продажбата на маици со слогани кои ја навредуваат Кина.

На интернет сајтот Spreadshirt.de во понуда се маици со слоганите „спаси куче, изеди Кинез“ и „спаси ајкула, изеди Кинез“, како и блузи со слика на два лажни карактера од кинеската азбука кои имаат секс со натпис „сега разбирам кинески“.

Кинеската амбасада соопшти дека се пожалила на германската влада и побарала „компанијата да ја запре продажбата на маици кои ја навредуваат Кина“, да се извини и да понуди објаснување.

„Истовремено, бараме германските надзорни власти да ги извршат своите обврски во однос на деловните активности на компанијата и на вебсајтот за да не бидат нарушени пријателските чувства меѓу нашите два народа“, стои во соопштението на амбасадата.

Во соопштението уште е наведено дека трговски и економски претставници на амбасадата веќе се сретнале со претставници на команијата „за да изразат огромно незадоволство“ од маиците.

Компанијата од Лајпциг која ги продава блузите засега нема официјален коментар, но кинеските медиуми јавуваат дека во Spreadshirt изјавиле дека не се одговорни за маиците со оглед дека служат само како платформа на која други дизајнери ја продаваат нивнaта облека.