Мистериозни закани со бомби во Русија

Во Москва беа евакуирани повеќе од десет стоковни куќи, меѓу кои и шопинг-центар во непосредна близина на Кремљ, јави агенцијата Интерфакс. Во текот на вчерашниот ден биле однесени на безбедно повеќе од 9000 луѓе. Сепак, ниту една од заканите за напад не се обистинила, тврдат руски безбедносни извори.

Од пред една недела во голем број руски градови кружат анонимни закани со напади. Се евакуираат училишта, шопинг-центри, железнички станици и хотели. Бомби не се пронајдени никаде, а позадината на заканите засега е непозната. Само во средата минатата недела во Москва имало повеќе од 100 телефонски повици со закани.

Руските медиуми шпекулираат околу можноста да се работи за вежби на безбедносните служби. Притоа се истакнува фактот дека централните безбедносни органи досега не се изјасниле јавно колу евакуациите. Според други претпоставки во медиумите пак, можеби се работи за хакерски напади. Булеварскиот весник „Комсомолскаја правда“, кој е близок на Кремљ, наводно прсти ги имаат вмешано украински сајбер-воини.

Кремљ ги осуди заканите, нарекувајќи ги телефонски терор. Одговорните мора да бидат пронајдени, изјави портпаролот на Кремљ, Дмитриј Песков, во четвртокот во Москва. Како што се вели, рускиот претседател Владимир Путин е информиран за состојбата.