Меркел му откажа на Трамп, го чека Вучиќ

Снежната бура која го зафати источниот брег на САД ја принуди германската канцеларка Меркел да ја одложи планираната посета на Вашингтон. Портпаролот на Белата Куќа, Шон Спајсер потврди дека средбата која беше закажана за денеска, се одлага за 17 март, по истиот распоред како и првично планираната.
Портпарол на германската канцеларка соопшти дека Трамп лично ја повикал Меркел за да ѝ ја објасни опасноста од бурата и ја советувал да го одложи патувањето.
Тоа требаше да биде првата тет-а-тет средба меѓу Меркел и Трамп. Тие имаа проблематичен старт во односите, судирајќи се за повеќе теми како трговијата, воените трошоци и, веројатно најмногу, во однос на имиграцијата. Во обраќање до парламентот пред посетата, Меркел најави дека на американскиот претседател ќе му порача оти „иако е забележлив раст на протекционистички и националистички пристапи, Европа никогаш не може да се изолира, да се запечати или повлече“.
Во Берлин денеска е поканет српскиот премиер Вучиќ, чија посета, пак, беше првично планирана за 17 март. Теми на разговорите ќе бидат билатералните односи, регионалните прашања, европската политика и економија, како и мигрантската политика.